「奇幻,純愛」《我,總是會愛上妳》: 回來了
好痛…全身都痛…
呢度係咪地獄?我係咪已經死左?
唔係喎死左應該feel唔到痛架啦,我而家feel到痛,咁我到底係生定死?
屌諗咁多托柒咩,試下睜開眼咪知囉。
之但係我既眼皮好似灌左鉛咁,要用盡我全身既力咁濟先開到眼。
白色既天花版,仲有盞燈,全部都好熟悉。
呢度應該係晨哥間屋。
感覺我好似訓左好耐咁,唉呀痛痛痛。
點解成身都痛既,之前都無架,訓醒無啦啦痛既。
仆你個街,條頸有野咬既,豪宅都會有床蚤架咩。
我望一望條頸,但係有個既黑影遮住左我視綫。
咁大隻床蚤都有既..咦唔係喎,有頭髮既…人黎架喎。
邊個咁惡趣味咬我條頸啊…
我:「好痛…你係度做乜..?」
聽到我咁講之後,果個頭就抬起左。
我:「Cherry…點解你會係度…」
Cherry:「lulu!!」
佢一下就撲左上黎,搞到我痛到不得了。
Cherry:「衰人!點解要講大話呃我!」
我:「邊個話你知件事架…Chase?定係Proto Zero…?」
Cherry:「邊個講重要咩!重點係你呃我!仲要係件咁嚴重既事!」
「點解咁大件事你都唔比我同你一齊面對!!」
佢既聲線由好嬲慢慢變到好傷心,好哀傷。聽到我心都痛埋。
我:「對…」
屌,呢個野太阻事啦,搞到我抖啖氣都覺得唔舒服。
我伸手拎走個氧氣罩,深呼吸左一下,感受一下新鮮空氣先。
我:「對唔住啊呃左你咁耐,好耐無見啦Cherry。」
「老婆。」
唔知係因為叫佢「老婆」定係其他野影響到,我一講完佢就攬我攬得更實,佢D頭髮仲差D拮到我隻眼,好險。
其實我本應係想同佢講聲對唔住先,但我唔知點解無咁做到。
見到佢喊哂口咁撲上黎,我就無辦法好似平時咁思考。
嘛,算啦呢d野無所謂啦。唉呀又痛添。
我忍唔到痛,伸手去捂住發痛既地方,呢下舉動當然逃唔過佢既法眼啦,我都唔知佢點解會察覺到,明明佢而家咁樣攬住我應該係睇唔到先係。
佢即刻放開左我,成個人好緊張咁捉住我個隻用黎捂住痛既手。
Cherry:「做咩呀lulu!係咪有邊度覺得唔舒服??」
見到佢咁緊張,我忍唔住大笑左,不過笑左兩下又覺得痛,最後笑到變咳。
Cherry:「喂!笑咩呀你估我同你玩架,我好認真架,你係咪有邊度唔舒服呀。」
我:「唔係…只係有D痛啫,可能因為我訓得耐得濟啫。」
我一邊講一邊伸手去拖起佢隻手,啊好懷念呢種感覺。
我有幾耐無拖過呢隻手呢…我估應該有兩個幾月掛…
佢應該同我抱有相同既諗法,大家都捉得對方既手好緊。
雖然我心入面仍然有好多問號,不過呢一刻就暫時放低先啦。
無人講野,大家都只係係度對望。
深情對望,應該就係指呢D?
嗯,咁就足夠啦,個心好暖,我終於…
晨哥:「打擾你地既甜蜜時刻真係唔好意思,不過檢查都係要做既。」
哎晨哥,點解偏偏揀係呢個時候啊,睇下氣氛啦你。
![](https://lihkg.com/assets/faces/normal/clown.gif)
我之後就好似人球咁比佢地推黎推去,check呢樣又照個樣,轉到我頭都暈。
嘩我只係訓左一排,晨哥間屋唔同左咁多既,多左好多醫院設備咁。
我連諗野既時間都無,到我回過神個陣,我已經返左去最初間房了。
我全家人都係哂度。
先唔講Cherry同Chase佢地三個,就連美星仲有老豆老母佢地都係度。
我:「唷…乜咁齊人呀…三代同堂喎而家。」
美星:「一向都三代同堂架啦白痴仔,而家係三代同場呀。
![](https://lihkg.com/assets/faces/normal/clown.gif)
我:「呃…是旦啦呢D野,點解老豆你地仲係香港?唔洗去玩?」
老豆:「你低能架,個仔搞成咁仲邊會有心情去玩,Chase病左的話你會唔會仲有心情去打機?」
呃…做乜個個都針對我。我明明無做錯任何野。
Cherry:「你夠膽話自己無做錯任何野?呃我已經係一件錯事啦。」
我:「我好肯定我無講出聲架喎…點解你會…」
Cherry:「做得你老婆又點會唔知你諗乜呀。睇你個眼神就已經…」
佢講到半路就突然停左,仲dup低頭退後。
我大概知道咩事,所以伸手捉住左佢,留佢係我身邊。
我仲向佢邊微笑邊搖頭,希望可以令佢安心D。
不過係呢個時候有人捉住左我另一隻手,拉走我既注意力。
係我阿媽。
我:「媽…
![](https://lihkg.com/assets/faces/normal/ass.gif)
媽:「點呀你,有無邊度覺得唔妥?
![](https://lihkg.com/assets/faces/normal/smile.gif)
我:「無…只係個身有D痛囉,唔知點解。」
媽:「傻仔,傷口未埋哂口所以咪會覺得痛囉。
![](https://lihkg.com/assets/faces/normal/angel.gif)
我:「傷口?我無啦啦點解會有傷口…唔通…
![](https://lihkg.com/assets/faces/normal/oh.gif)
晨哥:「係啊,已經幫你做左移植手術啦。」
係啊,唔怪得身體好似比起之前輕鬆左咁啦…
我:「多謝你呀晨哥,唔係有你的話,我可能真係會死…」
Cherry:「唔準講個死字呀你。
![](https://lihkg.com/assets/faces/normal/angry.gif)
我:「呃…Sorry。」
晨哥:「嘛,我應承得你既野我一定會做到既,但係你要多謝既人唔係我,多謝阿明仲有Ellie啦,同埋你都係要留係度觀察多一陣以策萬全。」
我:「嗯,我明白,咁就要繼續麻煩你多一陣了..呃痛…」
今次既痛唔係因為傷口痛,而係右手突然痛左一下,好似有野夾到咁。
我望左過去右邊,見到Chase企左係Cherry旁邊,好似做左唔知咩野咁。
我再望下自己隻右手,發現多左隻黑色手鐲。
我:「呢隻係…」
Cherry:「係Chase特登買比你既生日禮物呀,佢仲話上面既DBH有兩個意思添喎。」
我:「呃…Dragon Ball Hero?」
Chase:「食屎啦你,係Dad Back Home同Happy Birthday Dad呀!
![](https://lihkg.com/assets/faces/normal/fire.gif)
佢聽到我話Dragon Ball Hero之後即刻勁激動,好似想拎刀砍我咁。
咩啫,得三個英文字咁難估,係人都會估錯啦。
![](https://lihkg.com/assets/faces/normal/clown.gif)
不過,乖仔啊。
我伸出戴住手鐲既手,去摸Chase個頭。
我:「呢段時間,辛苦你啦。
![](https://lihkg.com/assets/faces/normal/wink.gif)
啊係喎,我記起啦…
我:「話說…Proto Zero呢?唔見佢既?
![](https://lihkg.com/assets/faces/normal/oh.gif)
我講完之後大家都靜左落黎,你眼望我眼咁。
見到咁我就心知不妙,好多之前放低左既問號一次過返哂黎。
我:「咪住先,邊個講件事出黎比Cherry你知架?Chase?美星?定係晨哥?」
都係無人答我。
過左一陣,晨哥先開聲。
晨哥:「其實,係Proto Zero講出黎。」
佢之後將成件事都講哂出黎,由Proto Zero入院到講件事比Cherry知一一講哂出黎。
我:「你地可唔可以出一出去先?我有野想單獨同晨哥傾下。」
好快,成間房就得返我同晨哥兩個。
我:「晨哥…」
晨哥:「嗯,同你諗既一樣,Proto Zero係出左事。」
「可能係因為當初實驗仲未做得夠全面就直接運用,所以先出現缺陷狀況。」
「起初為你做個批器官都出現左相同既情況,我地亦因此察覺到呢個問題,並一再改良,最後先成功到。」
我:「我個筆唔好講住,咁Proto Zero佢…」
晨哥:「嗯…因為佢都係用最初既細胞做出黎既,所以佢而家都面對緊…」
晨哥無講出之後既野,但我都明白佢想表達既意思。
我即刻想落床,但一大幅度咁郁傷口就痛,痛到我停左係度。
晨哥:「喂喂喂,好心你就諗下自己點先行動啦。」
我:「晨哥…幫我救佢…」
晨哥:「話哂係人命,我當然會救啦,你可以放心,我已經同Ellie開左D特別製造既藥比佢啦。」
呼,聽到咁我成個人鬆哂。
總覺得我欠左Proto Zero。
我:「晨哥,我可以返屋企之後,可唔可以帶我去搵Proto Zero?」
「我好想見下佢。」