「奇幻，純愛」《我，總是會愛上妳》: 我恨你
「喀嚓。」
Chase：「媽咪你返黎嗱？」
我：「嗯…係吖我返黎啦。」
估唔到佢會等我門，會唔會係佢都想知道lulu既情況呢？
啊唔係，佢應該係想知個位Proto Zero既情況先岩。佢以為個個係lulu。
Chase：「老豆..情況點呀？」
果然係想知呢件事啊…我應該點話俾佢知好？定係作個故仔呃佢好？
畢竟佢都只係咁細個…呢D事就算係我呢個大人一時三刻都接受唔到，我真係唔知話左俾佢知佢會有咩反應…
Chase：「媽咪？係咪有咩事？」
我：「啊…無事，你Daddy佢只係…只係血糖有D低，所以先暈架啫，唔洗擔心架，快d去訓啦好夜啦。」
算啦，都係唔好話佢知，所有野等我見到lulu先啦。
Chase：「你講大話。」
！？點解佢知道我講大話？
Chase：「若然情況真係你講既咁普通，點解你對眼會咁紅仲腫哂？」
Chase一邊講一邊企上張櫈上邊，從而縮短我同佢之間既身高差距。
亦係因為咁，佢有足夠高度可以摸到我塊臉。
佢隻得意既手仔，令我差D就又喊左出黎。
佢既細心仲有個份溫柔，同lulu真係一模一樣。
我真係好想快D見到你啊魯路修，我有好多好多野想問你…
我：「件事有少少複雜，遲D啦，遲D等Daddy返黎媽咪先話你知，我應承你。」
嗯…一切都等我見到佢先再算啦。
Chase：「係啊…Proto Zero佢講哂出黎啊…」
！？
佢知道件事？
我：「Chase？
」Chase：「果然係咁呢。」
Chase突然一下坐返低，好似變到好認真咁。
我：「你點解會知道？
」Chase：「嘛，原本我都唔sure既，所以咪拋Proto Zero呢個名出黎，如果佢係同左你坦白的話，你肯定會有頭先咁既反應。」
「如果無的話，到時我都可以用發up瘋做藉口甩身。」
一時間，我都唔知俾咩反應好。
好想問佢到底知道幾多，但又好想問佢點解會知道，總知就有好多好多野想問啦。
我踎低個人望住佢，不過又唔知由邊問起好，結果就變成我成個傻婆咁踎係度望住佢。
佢起初都無理我，不過可能見我望左咁耐，終於都肯望下我。
Chase：「哎唔好咁望住我啦媽咪，有乜想問咪出聲囉。」
啊，我居然會俾個仔咁話添。
我：「咁你可唔可以話我知點解你會知道Proto Zero既事，同埋你到底知道幾多？」
Chase：「全部啊。」
兩個字，嚇傻左我。
我：「你話全部..？我有無聽錯？」
Chase：「係呀，其實我知道哂成件事，大概係兩個月前我就發現左其實老豆唔係老豆。」
「啊係咪唔應該咁講呢，好似有D唔岩咁，嘛算啦諗咁多好麻煩。」
「總知之後我就問Proto Zero佢到底係邊個，佢就全部講哂出黎啦。」
「啊佢之後仲帶左我去見老豆添。」
見魯路修？Chase見過魯路修？
我：「點解咁大件事你唔話俾媽咪知！仲同人瞞住媽咪！」
一知道佢係中間有見過lulu我就不受控咁激動起黎。
Chase：「呃…老豆佢千叮萬囑叫我唔好話你知吖嘛..」
我：「呢筆我唔同你計住！咁佢點？精唔精神？」
Chase：「其實我都好耐無見過佢，所以我真係唔知…」
「我原本仲打算過幾日叫Proto Zero帶我去搵佢，等我送份生日禮物比老豆…」
生日禮物…？係喎Chase話過隻手觸唔係送俾「佢」，原來係咁解…
我真係蠢，咁都留意唔到，唉。
Chase：「DBH其實除左可以掉轉解成Happy Birthday Dad之外，最主要我係想話…」
「Dad，Back Home。」
Chase一邊摸住手觸一邊講。
我估唔到呢個傻仔自己一個背負著咁多野…
之前佢話發惡夢原來唔係空穴來風…而係佢知道lulu既事所以先會驚…
我忍唔住上前攬住佢，不斷掃佢個頭。
Cherry：「呢段時間要你自己一個人揹住個咁重要既秘密，真係辛苦你啦。
」「聽日，我地一齊去搵Daddy，好唔好？」
由於我仲有好多野未知道，所以我捉住Chase繼續問，所有細節我都想知，去到最後原來已經天光。
我有諗過會有一日係同仔女傾偈傾天光，但無諗過會係因為呢件事。
我：「天光啦。」
Chase：「嗯。」
我：「你洗唔洗訓陣先，你成晚都無訓過喎。」
Chase：「唔洗啦，聽完你講我仲邊訓得著，我甚至想而家就去搵佢。」
我：「嗯我都係，只不過如果Nicole醒左唔見我地的話…啊呢件事你無話俾你家姐知架可？」
Chase：「當然無，話左俾佢知咪即係等於話比你知，我先無咁蠢。
」Chase真係好聰明，咁細個已經識處理好呢D麻煩野。
Nicole：「咦細佬媽咪…
早晨啊。」哇一講曹操，曹操就到。
我：「早晨呀Nicole，咁早起身既？」
Nicole：「因為有少少擔心Daddy所以訓得唔係太好…」
啊，原來個女都係咁。
「叮噹~」
㩒鐘？咁早邊個啊？
我開門一睇，發現係晨哥仲有家姐。
我：「咁早既你地…
」晨哥：「唔好講咁多啦，我地出發啦。
」嗯。去搵佢啦。
我見到佢之後我一定會狠狠咁咬佢一啖，洩我心頭之恨。
明明話過唔會向我講大話，今次居然仲呃得我咁徹底，豈有此理！
之後我地就坐晨哥既車，踏上去搵魯路修既路上。
佢到底匿埋係邊等我搵唔到佢咁勁呢？
呢個問題既答案令我非常好奇，所以沿途車程我都細心留意四周。
不過去到中途，我開始用手捂住自己個口，以蓋我驚訝之容。
唔通係…
晨哥：「我地到啦。」
我恨你啊，魯路修。
你居然夠膽扮唔識我…
架車最後停係一架獨立屋前。
無錯，係西貢對住一片美景個間獨立屋。
估唔到個個人真係佢黎…我就奇怪點解又會有一個人同佢一樣樣。
晨哥之後就帶左我地去間病房睇佢。
我隔住塊玻璃，終於見到佢，我指真正既魯路修。
佢成身插住各式各樣既儀器訓係床上，甚至要帶住個呼吸面罩。
我真係烏鴉嘴，尋晚先話「起碼佢無全身插哂各式各樣既儀器先」..
死喇又喊添，我真係無鬼用。
家姐：「唔好喊啦，快D入去睇下佢先啦。
」家姐講得岩，我而家仲係度喊乜，應該即刻入去嘛。
我：「Chase，Nicole，同我一齊入去啦咁…」
Nicole：「媽咪你自己入去先啦，你地兩個獨處一陣先啦。」
Chase：「我地一陣入去都未遲。」
Nicole…Chase…你地真係乖…
我擦擦眼角既眼淚，之後就自己一個入左去。
我行到去床邊，好似尋日咁捉起佢隻手坐低係佢身邊。
今次我見到佢手臂上有道疤痕，證明呢個真係佢，真係魯路修黎。
我：「我好憎你啊lulu，你居然又講大話呃我，仲要係一件咁重要既事。」
「點解你有病唔肯話我知，唔俾我同你一齊去面對，仲要製造一個複製人黎呃我。」
「我地唔係兩夫妻黎架咩…你個傻佬…有咩都應該一齊分擔架…」
「你快D醒返俾我鬧俾我打啊聽唔聽到…」
我好似傻左咁對住佢一輪嘴咁講，但佢始終無俾反應我。
佢既雙目始終都係緊閉著。
我把心一橫，伸個頭埋去佢條頸度，好似吸血鬼咁咬左佢一啖。
呢一啖我久久不願鬆開，我自己都唔知原因。
我咬咬下仲開始流淚，眼淚滴左落佢個身度。
魯路修…快D醒啦好無…？
「好痛…你係度做乜..？
」