「奇幻，純愛」《我，總是會愛上妳》: 揭發
阿欣：「你呢排精神好似唔係咁好，係咪做野個邊有咩唔順利呀？」
我：「嗯，差唔多啦…阿欣你可唔可以借個大脾比我挨下？」
阿欣：「借左比你你點還先？
」佢把口係咁講，但都係好溫柔咁慢慢推我個頭落佢大脾度。
我合埋雙眼，感覺好安心，平日既煩惱都好似自己飛走哂咁。
更畫龍點睛既係，佢好似摸狗咁摸我個頭，雖然個比喻係衰左d，但種感覺真係太舒服。
佢好似係度直接撫摸緊我既靈魂咁，舒服到令人流眼淚。
見到我主動向佢尋求安慰咁反常佢都無問一句，只係一味安慰我，好似係度等緊我主動開口咁。
見唔見呀魯路修，我都有個好老婆架，唔只你有架。
你見唔見呀...
我轉一轉身打算望向佢，果然佢係一直望住我，用一個好慈祥既眼神望住我。
阿欣：「係咪有野想講呀？
」呢個世界我諗真係得佢一個可以了解我去到呢一個地步。
我：「我以為自己無所不能，咩都可以有辦法做到，咩問題都可以解決，但原來我錯哂，徹底錯哂。」
「我連一個朋友都救…都幫唔到…我甚至咩都做唔到，我覺得自己真係好無用。」
阿欣：「唔係吖，我覺得你好叻，甚至係呢個世界上最叻既人。」
「由以前開始你就好出眾，成績運動樣樣皆精，仲要好似神咁咩都知。」
「讀完書之後又係，明明自己係咩七星之一，條路可以好易行，但你偏偏選擇靠自己，開間公司自己打併仲要好成功。」
「最後仲娶到我呢個好女人，你話啦，咁既人邊度無用？」
「俾返d自信自己，繼續做個個人人眼中都係完美既藍洛晨！
」一番又一番讚美既說話，呢一刻卻令人聽得咁痛。
我想完全宣洩我積壓已久既情緒。方法只有一個。
我：「欣…聽我講，魯路修佢出左事…」
阿欣：「頭先你講話救唔到既朋友…就係魯路修？」
「不過佢會有乜事…佢而家唔係好地地係Cherry身邊咩..？」
我：「個一個唔係佢…係另外一個人。」
Sorry兄弟，但我真係忍唔住…
午夜時分，我帶住阿欣入西貢。
見到真相既佢相當驚訝，雙眼睜大仲用手掩住自己既嘴。
阿欣：「若然俾Cherry知道左的話…
」我：「嗯，呢樣亦係我呢兩個月黎煩既其中一件事…」
「你話見到佢而家咁又點忍心唔話俾Cherry知…話俾Cherry知起碼可以比佢地兩個一齊面對，但講左出黎的話…」
「我而家真係唔知應該點做…阿欣不如你話我知我應該點做…」
阿欣：「我..我都唔知…點做都係傷害到佢地兩個，我真係做唔到決定…」
「咁樣而家係Cherry身邊既又係邊個？點解會同魯路修一樣樣？」
我之後就將Proto Zero既所有野講哂出黎，因為事情比較複雜，我都花左唔少時間去解釋。
換黎既又係佢既愕然。
我：「係咪太複雜你一時間消化唔到？」
阿欣：「唔係..但我有無聽錯？你話個個Proto Zero都有魯路修既記憶？」
我：「呃..係呀，我地開頭都覺得好奇怪，因為我地手頭上係完全無有關記憶上傳既技術，我地仲因為咁煩惱過一排諗應該要點做好。」
「不過神奇既係佢見完魯路修之後就有哂所有魯路修既記憶..」
阿欣：「阿晨，如果…我話如果咋，Proto Zero鐘意左Cherry，我地應該點做好？」
我聽到呢個問題之後呆左一呆，唔知點答好。
我：「點解你會咁問？」
阿欣：「咁你話Proto Zero有魯路修既記憶，而魯路修又一直都咁愛Cherry…」
「假如佢繼承左記憶，會唔會同魯路修一樣鐘意Cherry..？」
呢個問題，我好似忽略左。
而家阿欣咁講我先留意到，Proto Zero既舉動太似魯路修，我既意思係似對Cherry好既魯路修。
我：「我諗應該無問題掛，畢竟之前Proto Zero應承左魯路修會暫代佢而唔係取代佢。」
阿欣：「承諾同自己既感情兩樣野只可取其一的話，你又會點做啊…」
再一次，無言以對。我都唔知自己到底發生乜事。智商好似急劇下降，連眼前既野都無辦法好好睇清楚咁。
我深呼吸左一下。
我：「點都好喇，而家首要既工作始終都係用盡所有方法去保住魯路修條命同醫好佢。救唔到佢的話我地傾呢個問題都無意思。」
「之後既事，之後再算。若然到時真係變成你講既情況的話…」
「我會出手。」
藍洛晨，要返黎啦。
因為太夜，所以我決定同阿欣係度留宿，等第二朝先走。
佢係度訓，而我就行左出露台，望住個海。
個腦不斷諗緊點樣應對阿欣提出既個個問題。
最簡單直接既方法我有，但呢個方法實在有少少殘忍。
假如魯路修知道我用呢個方法對Proto Zero的話，佢一定會話我架啦。
不過無所謂，幫到佢同Cherry就可以。所有野就由我承擔啦。
反正我都慣左。
好，去研究室個邊睇下先。
我打算行去研究室，途中經過阿欣床邊，見到佢訓得好開心，我都不自覺咁笑左。
多謝你，同你講完之後我成個人都舒服哂，好似放低左一舊大石咁。
同你一齊真係好神奇，同你一齊我可以做返一個普通人，可以依靠你，哈哈。
嘛，唔好講咁多啦，都係快d去睇先。
「撻，撻，撻。」
我坐係電腦前面㩒keyboard，睇下個批器官既情況。
融合度90%，無任何排斥反應。睇黎今次終於成功…
起初仲以為可以一次就成功，結果要試成十四次先叫做成功，果然世事總係不如人意啊…
不過只要唔放棄希望，希望就唔會放棄我呢句說話果然係岩。
而家只要搵個好手勢同守得秘密既醫生就可以…
等所有野都解決左同埋確保好複製技術既完成之後不如我都…
算啦都係唔好諗咁多，去訓啦，聽日起身就去搵醫生。
阿明：「晨哥？仲未訓既？」
我：「哦？阿明？你都係度既？」
阿明：「哦係呀，Ellen話Ellie最近都訓得唔好，所以我咪過黎陪下佢囉。」
我：「係啊..辛苦哂你地啦，按情況只要做埋移植手術所有野就結束啦。」
「呢段時間辛苦你地啦。」
阿明：「唔辛苦~難得Ellie可以有機會一展拳腳。」
「而且唔知點解見到佢咁既情況就好想幫佢，咩都唔在乎咁去幫佢。」
我：「係啊…？唔講啦我要去訓啦，聽日仲要去搵醫生預備手術？」
阿明：「啊，醫生我地一開始已經準備左啦，仲要係你指名既，你唔記得左？」
我：「啊，又好似係，死喇開始無記性添。」
阿明：「佢聽日就會黎做手術架啦，我會隨時向你報告情況。」
我：「嗯，拜託啦。」
我拎左部電話出黎，打算睇下而家幾點，但眼卻望左去日期度。
啊…原來聽日就係呀。
生日party…