「奇幻，純愛」《我，總是會愛上妳》: 派對

萬事俱備，而家要做既就係等個日到啦。

唔知到時佢會唔會鐘意呢個驚喜呢？

一定會鐘意既，因為係我為佢準備架嘛。

但係點解我硬係有d不安既？硬係覺得自己做漏左D野，錯過左D野咁。

係咪我多心左呢？最近我既感覺都唔係咁準，全部都估錯哂。

好似係自從佢出左去一星期做野之後我既感覺就唔中。

之前覺得佢古古怪怪，好似成個人唔同左咁，結果係自己諗多左，佢仲係以前個個白痴。

仲有份body check report，如果唔係晨哥都開口話份野係假，我肯定已經捉左佢去醫院。

我硬係覺得佢有野瞞住我，但又搵唔到任何證據去證實我既預感。

可能真係我多心啦，都係專心搞佢既生日party啦。

聽日就要去家姐間café睇下可以點佈置同check定d器具，之後仲要去買…

Chase：「媽咪。」

Chase突然出現係我面前，將我係自己既世界中拉走。

我：「唔？做乜呀Chase？同你阿爸打完機嗱？」

Chase：「嗯，佢仲落左街，話想食麥當勞喎。

」

正一為食鬼。

我：「哦~咁你黎搵我做咩呀？講明先呀我唔會俾錢你課金架。

」

Chase：「唔係啦我課金會用自己錢架。

」

我：「咁你有乜事呀傻豬？」

Chase：「我訓唔著…唔知點解我呢排好似好古怪，個心總係靜唔到落黎…」

我：「傻豬，你做過咩黎吖？講大話先會訓唔著架喎。你係咪講過大話呃人？

」

Chase：「無呀…但係我最近成日發夢夢見老豆…老豆病左，得返我地三個，我好驚…

」

呢個傻仔，講講下突然踎低仲抱住自己個頭，成個人係度震。我見到佢咁我即刻去攬住佢，仲輕輕力咁掃佢個頭。

我：「傻豬，夢黎架啫，無事架，你睇下你老豆而家咪好地地，啱啱仲同你一齊打機添係咪？」

Chase：「但係…我真係訓唔到…一合埋眼就會見到個D情景…」

我：「唔…咁好啦，媽咪講故仔氹你訓啦，想聽咩故仔吖？」

Chase：「我想聽…你同老豆既故仔。」

我忍唔住笑左一下。

我：「無辦法，由我講一次啦，所有野都要由中一講起…」

見到Chase，我就會諗起lulu中學個陣既樣，唔知Chase大個左會唔會好似lulu咁呢？

不過估唔到Chase會發夢夢到lulu病左…我既預感會唔會…

結果我成晚都係Chase身邊陪住佢訓，個傻豬捉住我隻手捉到實一實，仲念念有詞咁，不過我聽唔到佢講乜，因為佢講到一舊舊咁哈哈。

第二朝起身，我訓到腰骨都痛埋，因為Chase張床太細啦哈哈。

但係我一張開眼就見到Chase個樣，個種感覺真係超級幸福。

比起每朝起身見到lulu更加幸福，因為Chase同Nicole就好似係我同佢既愛情結晶品咁。

應該無野比睇住佢地大更加幸福啦。我果然係個好媽媽呢。

好喇…我呢個好媽媽要去為個傻仔爸爸準備生日party啦。

正當我鬆開Chase隻手仔個陣，佢就即刻醒左，真係有咁岩得咁橋。

Chase：「唔…媽咪？

」

我：「早晨呀Chase，尋晚仲有無發惡夢？

」

Chase：「咦..你咁講又好似無…

」

我：「嗱媽咪係咪好勁呢，一陪你訓你就即刻無發惡夢喇。

」

我咁講完之後Chase就即刻用個好無奈既樣望住我，十足十佢老豆咁。

我：「咁既然媽咪幫左你咁多，Chase你今日可唔可以陪下媽咪呀？」

Chase：「咩事先？麻煩既野我唔會做架。

」

我：「我諗應該唔會好麻煩架啫，我想你同家姐陪我去美星姑媽間cafe度，之後再去買禮物。」

Chase：「買禮物？我有無..」

我：「無吖，買比你Daddy架。

」

Chase：「哎…」

我：「不過如果你表現好我可能或者maybe會考慮下送一份禮物比你既。」

Chase：「好！我去我去！

」

你睇，幾易上釣。

Nicole：「媽咪~我肚餓啦。」

我：「咦Nicole你都醒左嗱？肚餓？Daddy無煮野比你食咩？」

Nicole：「Daddy？Daddy出左去啊。」

出左去？咁早就出去？而家先十點幾咋喎。

我：「好啦咁你兩個快D換衫啦，我地出去食野之後去美星姑媽啦！

」

今日應該會好忙呢…

果然帶住兩個細路出街真係特別開心，我既笑容無一刻係收起既。

三個人開開心心咁食完拉麵之後就開始去搵家姐，去到café兩個細路就即刻去左佢地個所謂「王國」度玩。

呢個「王國」其實係家姐專登設計既，係一個角落入面放有一個個書櫃，櫃入面有好多漫畫小說之類。

好喇，既然佢地都已經自己安頓好唔洗我操心，咁我都可以專心d喇…

點搞好呢…呢度放張檯專係放野飲，呢邊要清空預佢地到時玩game…

雪櫃同蛋糕櫃仲要同家姐佢地講定先，等佢到時叫d人清空佢放cup cake。

Um…仲有咩呢？

家姐：「阿妹？黎左既？搵我有事？」

家姐突然係我背後叫我，嚇到我忍唔出「呀！」一聲叫左出黎。

我：「嚇死我咩家姐，無啦啦係人地後面彈出黎。」

家姐：「哈哈Sorry呀，咁你黎係做乜呀？」

我：「啊，我係準備lulu既生日party架，我想俾個驚喜佢。」

家姐：「啊，係喎你唔講我都唔記得添…又就快到佢生日…」

家姐既語氣仲有語速都突然間變左，好似有野諗咁。

我：「家姐？」

家姐：「呀！咩事呀？」

我：「你係咪有咩事..？見你好似心事重重咁…」

家姐：「無！無事。係呢你想係度搞？咁你需唔需要佈置之類？我有無咩可以幫到你？」

我：「有呀有呀，嗱我想咁啦咁啦…」

之後落黎既半個鐘，我將我所有想係當日做既野講哂俾佢知，佢全部都應承左，仲話我一定會滿意。

好，之後就係去揀禮物啦，到底買乜俾個傻佬好我真係一D頭緒都無，所以我就全盤交哂俾兩個細路去做。

不過都係得Nicole去揀，Chase無乜興趣，個樣仲悶悶不樂咁。

作為一個好媽媽，我當然要去關心我個仔啦。

我：「做乜呀Chase？個樣咁既？有心事？」

Chase：「我…算啦…都係無野啦。

」

肯定係想扭我買野啦，好，我就即管睇下你今次用咩招數。