「奇幻，純愛」《我，總是會愛上妳》: 命運

我開始相信呢個世界有上帝既存在。

早幾日先講完可以同佢睇到呢到呢遍風㬌就死而無憾，今日就同佢睇到，雖然形成上有少少唔同，不過算喇。

而家既我都無辦法強求咩喇…

不過佢居然會出現係呢度…可能呢d就係命運啦。

命運注定我總係離唔開佢。

啊，麻煩啦，佢注意到我，仲行緊過黎添。都係快D返入去先。

Cherry：「請問..！！」

佢係沙灘嗌上黎，好耐無聽過佢把聲令我一時間呆左，企左係原地。

把聲仲係咁好聽，猶如天使之音。

亦因為呢一下硬直，我錯過左返入去屋既最好機會。

當我回過神之後，發現佢已經走到黎樓下，仰望緊我。

同佢四目交投之後我個心突然出現劇痛，好似俾人緊緊握住咁，仲好想喊。

Cherry：「你係lulu..？點解你會係呢度？」

我：「邊個係lulu。」

呢一刻，我必需帶上面具，否則就會前功盡廢，一切都會化成泡影，仲會走向我一直極力避免既發展。

或者咁都係我必需面對既命運啦。

Cherry：「eh…你唔係魯路修？」

我：「魯路修？咩名黎架咁怪既，我唔係魯路修，我叫…」

仆街批評自己個名感覺真係好怪。

叫咩名好呢…就叫…

「叫我阿希就可以。」

Cherry：「係啊…Sorry呀我認錯人，因為你真係同佢一模一樣，仲連把聲都一樣，所以我一時之間先會認錯左你係佢。」

梗係一樣啦，因為我就係魯路修啊傻婆。

呢d說話我點可以講出口吖，只可以係心入面講。

我：「同我一樣？又會咁岩既？咁佢係你邊個？對你好重要？」

Cherry：「嗯，佢係我老公，可以話係呢個世界上對我最重要既人。」

「如果無左佢我都唔知點算好喇哈哈。」

Cherry…佢真心既說話對而家既我黎講卻係一支支鋒利既箭，每一句都插係我呢個早已疲憊不堪既心同身上。

就算係咁，我都提醒自己要繼續扮落去。

我：「係啊…咁小姐你就要好好珍惜佢喇。」

Cherry：「哈哈！我當然會啦，佢唔會離開到我架，我想問下你住係度架？」

我：「當然啦。如果唔係我又點可以企係呢度同你傾偈。」

Cherry：「咁講又係吖可。你就好喇，每日都可以睇到咁靚既夕陽。」

我：「你都覺得個夕陽靚？」

Cherry：「梗係靚啦，直頭好似人間仙境咁，可以的話我都想同佢一齊睇吖。」

已經一齊睇左啦傻婆…

Cherry：「噢，天黑囉。」

我：「嗯，夕陽無限好，只是近黃昏嘛。」

Cherry：「唔緊要啦，反正太陽一定會再出黎，聽日又可以睇到架啦。」

嗯，只係唔知我可唔可以再同你一齊睇夕陽啫…

Cherry：「咁既然天都黑左，我都要走喇，打擾到你真係唔好意思。」

我：「唔緊要，你陪我傾偈我仲好開心添，再見喇。」

我向佢揮手道別之後就轉身行返入屋，但行左兩步又聽到佢把聲。

Cherry：「阿希~

」

我探頭望望，見到佢同我一樣，都行左兩步，同我間屋距離更近。

我：「咩事？

」

Cherry：「無，只係想同你講句，同你傾偈就好似同緊佢傾偈咁啫哈哈，有種熟悉既感覺，真係好奇怪。

」

「唔阻你啦，有緣再見啦我地。

」

佢講完就繼續行，慢慢慢慢咁離開我視綫。

而我只係係度目送佢既背景，直至佢完全消失係我眼中。

「呼…」

深呼吸左一下之後，我就繼續行返入屋，最後撻係床上。

再喊唔出咩眼淚啦，因為眼淚早已滿佈臉上。

我唔知自己咁樣訓係度訓左幾耐，不過當有人打開房門個陣個天已經黑哂，應該過左一段時間。

入黎既人並無開燈，只係俾房外既光線照入黎，照到入黎我眼入面。

條友仲要咩都無講，只係企係度，我feel到佢係度望住我。

仲要望到我好唔舒服。

我：「邊個…？」

「聽Sarah仲有Yui講，你今日遇到Cherry？」

哦，原來係晨哥。

我打算爬起身，坐返直個人，但係唔知點解個人好似無力咁，最後都係撻左係床上面。

晨哥：「唔洗啦，就咁就可以啦，我可唔可以開燈？」

我：「可以呀，隨便。」

「噠！」

一下子成間房都光猛哂，我總算可以見到晨哥既樣。

佢著住件lab袍挨係牆邊，臉色有少少凝重。

我：「唷，做乜鬼無啦啦著住件lab袍？」

晨哥：「哦？屌係喎唔記得除添，無我岩岩去左lab啫。」

我：「哦。咁你搵我有乜野事？」

晨哥：「你…無野吖嘛。」

我：「唔？我會有乜野？」

晨哥：「你唔係同佢傾過偈？」

我：「係啊，傾左一陣，叫做一齊睇左個日落。」

「早幾日先話可以同佢一齊睇日落就好，估唔到今日就實現到，個天對我真係好呀哈哈。」

「而且我仲可以係佢口中聽到我係佢最重要既人，咩都值哂。