「奇幻，純愛」《我，總是會愛上妳》: 聚會
我：「喂Sorry呀我都唔知點解自己突然間會咁惡，無嚇親你嘛。」
Chase：「無事，唔洗擔心。」
我為乜道歉？咪就係為左今日食飯個陣鬧Chase個件事囉。
我都唔知點解自己會咁，但一見到Chase佢咁無禮貌咁對Cherry，我就控制唔到自己。
鬧完之後我先回神，覺得自己做得過分左，所以一返到屋企我就即刻同Chase佢道歉。
雖然Chase把口就話無事，但我見到佢塊臉仲係黑過包公，我就知道佢仲係嬲緊。
我周圍望左兩望，確保左Cherry同Nicole都唔係廳度之後，我就烏低少少個人，就返Chase既高度，細細聲咁同佢講野。
我：「呢度得你同我兩個，有咩唔開心咪攤出黎講囉，你知啦，我地兩個要合作架嘛…」
我咁講完之後Chase終於肯擰個頭過黎望下我，眼神仲係相當不屑。
Chase：「我明白我地要合作，只係個感覺我真係好難消化。」
我：「eh…咁係人比人話都會唔好受架啦，而且你頭先真係太無禮貌我先話你兩句啫。」
Chase：「唔係，我唔係講呢樣，我都明白頭先係我太激動，係我唔岩。」
哦？一個小學二年級既細路都識自我反省，唔係，呢個細路唔可以用一般人去評估。
咦？咁佢話咩「個感覺我真係好難消化」？佢係指乜？
Chase：「你頭先鬧我個陣真係同我老豆嬲個陣一模一樣…」
同魯路修一模一樣呀…？
聽到佢咁講，我突然不自控咁伸手去摸下Chase個頭。
我：「嘛，你都知架，我係佢既…」
我故意唔講哂成句野，因為我怕Cherry佢地會突然出黎。
Chase：「嗯，我真係ok，所以唔好阻我打機ok？
」哦，原來我阻住佢打機。
咦，電話響喎，講開又講，今次好似係我黎左咁耐第一次電話響，平時最多都只係Whatsapp響。
諗咁多野做乜，都係聽左個電話先啦，我望左一眼睇下係邊個打黎，原來係師父。
我：「喂？
」師父：「喂仆街仔我地幾個約左今晚食飯喎，你黎唔黎呀？」
啊係喎…佢地唔同晨哥，唔知魯路修已經去左醫病，我應該點應對好呢。
試下問下佢地睇下今晚有邊個去，如果有晨哥份的話咁所有野都易辦啦。
我：「喂咁今晚有邊個去先。
」師父：「eh…我啦，Jason，肥豬，仲有Aaron囉。」
無晨哥？
我：「喂，晨哥佢地呢？佢地唔出黎？」
師父：「唔知呀屌，有搵過佢但佢話好忙，好似話係研究所有野忙行唔開，其他人都話要返工。」
研究所！？唔通魯路修佢有乜事？
師父：「點呀你黎唔黎架？我返緊工架，係去左蛇王先打到比你咋唔好哂我時間啦。」
我：「哦..好好好。」
師父：「嗱！咁今晚七點旺角等啦柒頭！遲到正契弟呀！
」咦仆街啦我應承左佢咩？喂等陣先！
我都未開口，佢就已經cut左我線…
屌，點算好，去又會好難搞，唔去又會搞臭魯路修個名…又係兩難局面。
無理由帶埋Chase去架？點算好呢？
Cherry：「師父佢地搵你去食飯呀？去囉~
」哇佢幾時行返出黎架？好彩無講咩秘密啫，但係佢又知係師父搵我去食飯既。
我：「你點知架？」
Cherry：「次次都係咁上下架啦，今晚我同對仔女食啦，你去同佢地食飯啦~」
我：「不過…」
Cherry：「去啦去輕鬆下啦~但係要記住唔好飲咁多酒喎，你知你唔飲得架啦。」
唉屌…點解會變成咁…
七點鐘，我人在旺角。
一陣同佢地食飯吹水會唔會穿煲架…俾佢地發現到我唔係魯路修的話應該會搞到成件事複雜十倍以上。
啊，諗起都覺得麻煩，一定要慎重應對先得。
「喂魯路修，做乜成個人呆哂？」
呀，係Jason仲有Aaron，佢地幾時黎架，我完全無為意添。
唔好問我點解知道係佢地，我都唔知點解，只係見到佢地我就知道佢地係邊個。
我：「唷…好耐無見..」
Jason：「好耐咩？一個月左右啫。唔好講咁多啦快D行啦我好撚肚餓。」
我：「吓咁師父仲有肥豬呢？唔等埋佢地呀？」
Aaron：「肥豬到左間餐廳喇，至於師父就..」
佢講到一半就突然自己笑起上黎，連Jason都笑埋一份，我就知師父一定係做左D柒野。
Jason：「條仆街同我地一齊黎架，點知頭先突然話肚痛去左痾屎，叫我地唔洗等佢，快d去餐廳叫野食喎。」
咁都得…師父真係十年如－日…
我：「咁點呀，我地去邊度食？」
Jason：「跟我黎啦問，你牛高馬大慌我會賣左你咩。」
啊屌佢講野仲係咁摟打…
之後我地三個就行呀行，最後去左一棟大廈搭𨋢上樓，咁先去到個間餐廳。
起初我以為我地會去大牌檔之類既地方食，但呢間餐廳完出符我意料之外。
好靜。
呢間餐廳唔係無客人，但成間野既感覺都好靜，只係聽到餐具聲同音樂聲。
而且燈光都比較暗，俾到人既感覺好舒服，好似可以放低d煩惱咁。
Aaron：「肥豬呢？又話到左既。」
Jason：「呢~咪係bar檯度個度撩緊女囉，死性不改。」
Jason一邊講一邊行埋去，我同Aaron亦跟住行埋去。
行左入餐廳只係兩步，肥豬已經注意到我地，即刻起身行埋黎。
肥豬：「喂等左你地好耐啦，快d叫野食啦。」
之後我地四個就搵左張檯坐低，睇下有咩食，我出於好奇，問左一句。
我：「呢度咁隱蔽，點解會揀呢間既。」
肥豬：「因為呢度夠靜，好適合傾計囉。」
仆街佢地真係打算吹水…今鋪麻煩了…
唯有慎重應對啦…求神拜佛唔好露出咩馬腳呀。
我拉緊我身體每一處既神經，盡量提高警覺。
不過係我有既記憶入面，呢四個人都唔算好聰明，至少唔係晨哥咁講錯一句野就會俾佢知道一切。
就算係咁都唔可以掉以輕心。
我地先叫左野食同一堆野飲，之後先慢慢吹水。話題離不開都係生活，好似工作，感情之類。
肥豬：「喂你真係唔打算拍拖結婚呀？你條件都唔係差架喎。」
我：「係囉Jason，搵返個伴啦。」
Jason：「唔啦，唔想再拍拖啦，個人好攰啦真係。」
師父：「屌你玩到話唔溝女？我想溝都溝唔到呀！」
Aaron：「咁你咪返去溝你家姐囉。」
師父：「條八婆有人埋單啦。」
我：「幾時既事？不過唔意外啦一直都話你家姐正架。」
師父：「下個月擺酒啦，屌咪又係港女一個，講乜正唔正。」
「係~呢度係你地叫既野食。」
哦，d野食咁快就黎到嗱？
咦…？呢個人咁熟口面既，唔係，一定係我既錯覺，都係專心d啦。
師父：「喂唔好講咁多，快d飲杯先啦。」
師父拎起幾支啤酒，逐支逐支遞比我地。
我：「喂我唔飲酒…」
師父：「今日咁開心飲一支啦。」
我：「唔係呢…」
Jason：「算喇師父唔好逼佢啦你又唔係第一日識佢。」
師父：「車，咁無癮架。」
呼…我真係怕自己飲醉左會爆哂所有野出黎，好彩有Jason啫。
之後佢地開始係度談天說地，而我就自己一個係度飲野，盡可能唔參與佢地既討論，以免有事。
不過，感覺真係好怪，我好似格格不入咁。
明明有以前同佢地一齊顛一齊玩既記憶，佢地講既每一件事我都有印象，但我個心卻一直提住一件事。
個一個同佢一齊經歷呢一切既人，並唔係我。但我又要扮到係我黎…
呢一餐飯，真係好難過…
我搵到一個機會借尿遁，暫時行開一下抖啖氣。
「點呀，同佢地傾完有無開心番D呀？」
點解又係呢個人既..