「奇幻，純愛」《我，總是會愛上妳》: 托付
我係邊個…？呢度又係咩地方…？
個頭…好痛。
「晨哥，佢醒左喇。」
「嗯，叫Ellie佢地過黎幫佢檢查下先啦。」
我：「你地係咩人…？」
「佢識講野既？」
識講野好出奇咩？喂！放開我！！
一個好高又好型既男人捉住左我雙臂，睜大雙眼望住我。
「你話我知，我係邊個？」
我：「我點知你係邊個！快d放開我！」
我咁講完之後feel到呢條友震左一下，佢仲慢慢咁縮手，慢慢咁後退。
佢既反應，好似好錯愕咁既？唔通我真係識佢？但我真係無印象喎。
之後呢兩個男人出左去，帶左一堆好似醫生護士咁既返黎幫我check呢樣check果樣，問下我叫咩名咁。
最好笑既係佢地仲俾D中文字同英文字母我叫我讀出黎，好似以為我咩都唔知咁。
最後個醫生話我身體一切正常，呼嚇死我啦仲以為自己會有咩事。
不過我到底係…
「解釋唔到…正常黎講應該唔會咁架…」
係我苦惱緊自己既事既時候，有把女聲傳入我中，係一把非常溫柔既女聲，搞到我即刻望左過去。
唔望尤旨可，一望真係不得了，呢條女正到呢！！
茶色既長頭髮！端正既五官！加上lab袍同黑色既高踭鞋！簡直就係女神！有仙氣！！
佢一邊睇文件一邊行，最後行到去我面前停低，仲同我對望。
哇今次我真的戀愛了。
「你真係唔知自己叫咩名？」
呢位女神把聲都好好聽。
我：「唔知，不過呢位小姐可唔可以話我知你叫咩名？我想同你做個朋友。」
「吓…？呃…我叫Ellie…」
Ellie，一個幾咁動聽既名，不愧係女神。
正當我想同女神Ellie進一步交流下果陣，偏偏佢就行開左，行左去頭先我起身第一眼見到個兩個男人度。
佢地好似係度討論緊d野，討論d咩我就聽唔到喇。
佢地討論左一陣之後就行左埋黎，個個既面口都好難睇。
「你行唔行到。」
頭先捉住我既男人率先開聲。
我：「可以。」
「咁跟我地黎，帶你去見一個人。」
見一個人？
肉隨砧板上，你要我做咩我都要做架啦。
我跟住佢地三個行，第一次離開間房，哇呢度既格局唔似醫院喎，呢度到底係咩地方呢。
行啊行，行啊行，最後我地行到去一間房。
呢間房好多儀器，全部都係睇D醫生戲會見到既野，估唔到我有機會見到實物。
而係呢堆儀器中間，有一個人訓左係度。
「你入去啦。」
我：「吓？我自己一個？」
「係，入面既人想見你。」
我：「但係...」
「屌…叫你入去呀！
」屌，入咪入囉，唔洗推我架。
無錯，我被頭先果個男人一下推左入去間病房，佢仲即刻閂門，慌死我會走左去咁。
唉，都係等我去睇下到底係咩人想見我先。
只不過當我一轉身，一見到訓係床上既人果陣，我個心口突然間痛起黎。
呢種痛到底係咩事…
「唷…黎左嗱…坐啦唔好客氣。
」一把好虛弱既男聲傳到我耳邊。毫無疑問呢把聲一定係屬於訓係床上面個條友。
果然係，佢仲好似想坐起身咁，見佢好似好辛苦咁我都唔忍心，決定上前幫佢。
我一扶佢坐返好，佢就即刻捉住我隻手，嚇到我彈起。
但有件事好奇怪，我明明可以好輕鬆就fing開佢，不過我居然無咁做。
我只係成個人呆左咁同佢對望。
明明佢成個人睇落非常虛弱，但佢既眼神卻非常堅定，非常有力，好似有野想同我講咁。
而且，同佢對望有一種唔識形容既感覺，死喇唔通我係gay既？
唔會既！我一定唔會係gay！
為左打破呢種尷尬既感覺，我決定開聲。
我：「佢地話…你想見我？」
男：「係啊…」
我：「你識得我？我對自己係邊個一d印象都無。」
男：「雖然咁突然可能會嚇親你…但我唔想呃你…」
「你其實…係我既複製品。」
複製品..？即係我其實係複製人..？
我：「喂唔好玩啦，我係複製人？呢個世界邊有咩複製人呀，你估而家睇高達咩？講笑搵第樣啦。」
男：「唔信的話，你可以拎個邊個塊鏡睇下我地個樣…」
屌，拎咪拎，怕你咩？
當我一拎塊鏡照我地兩個個樣，我成個人呆哂。
雖然佢而家個樣可以用面無血色黎形容，但仍然可以睇得出一件事。
我個樣同佢個樣真係有九成相似…
我：「屌人有相似啫！我就唔信啦！」
男：「咁…不如大家一齊寫個食字出黎睇下？」
食字？寫咪寫囉。
雖然唔知佢到底係度盤算緊d乜，但我都係照樣用平常心寫左個「食」字出黎。
結果再一次震撼左我。
兩個食字，一模一樣。
我所講既一模一樣並唔係寫到完全一模一樣好似copy and paste咁，我所講既一模一樣係連習慣都係一樣。
男：「我有個壞習慣一直都改唔到，就係寫個食字果陣會寫到飠字邊咁…最後個筆無穿出黎…」
「因為你係我既複製品，連呢d習慣都複製埋…」
我：「無可能！我唔信！」
我居然只係一個訓係病床上，連想坐好都要人幫既人既複製品。
男：「你冷靜d先…我只係想拜託你一件事…」
我：「唔好講笑啦，我唔會…」
「幫我好好咁照顧Cherry佢地…」
！？我個頭！！
我個頭突然間好痛！！
「Cherry，Chase，仲有Nicole佢地三個而家唔可以無左我架…」
呀！！！師父好撚痛呀！！！
我個頭開始更加痛，好似比針不停咁拮，痛到不得了。
係因為個三個名…？
我：「話我知你既一切。」
雖然不願相信，但我不得不承認，我同呢個男人有某種連繫。
佢之後一一將所有有關佢自己既野講哂俾我聽，好似佢叫魯路修，花名係lulu之類。
而每當佢提到某D特定人名，我個頭都會覺得好痛。
佢所講既所有事，我都好似有d印象，不過好模糊，似有又好似無咁。
係聽佢講故仔既呢短短十五分鐘，我就好似已經接受左自己係複製人呢件事咁。
會唔會快得濟呢？可能佢到而家講既所有野都係大話，用黎呃我呢？
唔得，問下野探下佢口風先。
我：「咁…你想我做咩？你製造我出黎係為左乜？」
lulu：「頭先都有講過…我想你代替我…去照顧Cherry佢地…」
「唔洗好耐架，只要等我…只要等一兩年，等Chase同Nicole大個D，到時你就可以去過自己想過既生活…」
佢咁講...唔通佢知道自己已經無得救..？
「求下你…你應該都唔想Cherry…」
Cherry…呢個名…點解我每一次聽到都會咁辛苦…
「我可以拜託既人，大慨就只有你一個啦…」
佢再一次用個個堅定既眼神望住我。
我一時心軟，應承左。
Lulu：「多謝你…咳咳！！」
我：「喂你無野吖…
」「魯路修！！！
」我都未講完就有一把女聲係我背後傳出，仲要係好大聲，嚇親我。
呢把聲既主人，會唔會就係個個Cherry？
出於出奇，我擰轉臉，睇下到底係邊個。
「家姐…」
咦…？
我之所以會有咁既反應，係因為我同lulu同一時間講左「家姐」兩個字出黎。
呢個人係美星…點解我會知…
美星：「點解…會有兩個魯路修…
」lulu：「家姐…我先係魯路修…」
美星：「咁你係…」
美星用個好疑惑既眼神同語氣望住我講。
我：「我…好似係lulu既複製人…」
屌，我明明無做錯事，點解對住佢我會咁淆底…
美星：「複製人？你地搞乜黎呀？魯路修你又點解會搞成咁…」
睇黎而家唔關我事…都係退埋一邊先。
我離開床邊，讓個位比美星埋黎，美星亦立即行動，一下就行到去床邊。
我係旁邊睇住佢地兩個。
Lulu：「對唔住啊家姐，一直瞞住你…」
美星：「做乜你咁傻，病左都唔肯話俾我地知呀？」
lulu：「我唔想你地擔心嘛…」
美星：「傻瓜！我地一家人黎架嘛！有乜野都應該一齊分擔！Cherry佢知唔知？」
Cherry…又係呢個名…
Lulu：「我最唔想俾佢知…唔想再見到佢傷心，所以先拜託晨哥整個複製人代替我…」
講緊我？我見佢地兩個都突然望住我既。
美星：「代替你！？你想叫佢代替你去照顧Cherry佢地？」
lulu：「Chase同Nicole仲細…如果要Cherry一個照顧佢地Cherry會好辛苦…」
「而且我唔想佢兩個咁細個就無左爸爸…」
美星：「就只係因為咁？因為呢d理由你就甘心將老婆仔女都交俾人地？」
lulu：「咁我又有乜辦法喎…而家既我根本就…」
佢咁講完大家都靜左落黎，無人再出聲。