[年齡無界限] 就係咁，我最近出席好多喪禮: １６３　從回這個家

如果平常嘅老人家聽到細路仔叫自己做爺爺，可能會好開心，但係我望住呢兩個細路仔，見到佢叫我做爺爺……我無咩野感覺。

因為，阿芳唔係我親生。

所以，佢地兩個都唔係我親孫。

不過其實呢排經歷左咁多事，對於呢兩個孫仔都有另一種心情。

但係……





「爺……爺爺。」阿芳兩個仔女畏首畏尾咁匿左係佢身後話。

其實我同佢地兩個已經唔係第一次見，只不過我同佢地兩個無咩交集，無交集度只會同佢地擦身而過，從來都無過問任何野。

我行近佢地，但係，佢地用一個抗拒嘅眼神望住我，所以我無再行近。

「阿爸，你又會無啦啦黎嘅？」阿芳問。

「……無，我見好耐都無返黎睇一睇，所以……」其實我都唔知點樣答阿芳嘅問題，好彩呢個時候升降機門開，先回避左唔答佢。





一入到去，我地幾個好明顯企左兩邊。

係一種隔漠，係一種無形嘅尷尬。

「阿爸，今日買左條魚好靚下，留低食飯好唔好？」阿芳問。

「……好。」我答。

然後佢靜一靜後又再話：「阿偉返左大陸做野，所以呢排都唔係度。」佢口中嘅阿偉，係佢老公。





「嗯。」我點一點頭，我同呢個阿偉關係其實唔多好。

升降機門開，我跟住佢地三個人身後面返到呢一個陌生嘅家門口，呢一個，我曾經獲得幸福嘅地方。