[年齡無界限] 就係咁，我最近出席好多喪禮: １６２　爺爺

我已經好耐無行呢一條路，呢一條我曾經每日都會行嘅一條路，而家，已經唔同晒。

「你未係輝爺？」估唔到，咁耐無出現過嘅我都仲有人認得我，我睇真Ｄ眼前果個人，係一個士多嘅老闆。

「好耐無見。」我答佢。

「係囉，好幾年都無見過你啊，你去左邊啊？」佢問。

面對佢嘅問題，我只係笑左笑。





「見到你就好，剛剛你個女話留Ｄ野比佢，而家比你都一樣姐。」佢都無問我意見，就將幾袋野拎左比我。

熟悉嘅風景，熟悉嘅地方，但係卻有陌生嘅感覺，呢個電梯大堂，無咩點變，只係果把風扇舊到好似就跌咁，看更位果個人都係中緊眼訓。

而家個個屋村嘅樓都有密碼，如果唔係頭先有人出黎，我真係入唔到黎。

我拎住幾袋野，企左係電梯大堂Ｄ電梯前係度諗，究竟，我個女住邊架呢？

……應該話，我呢一個家，係邊呢？





「阿爸，點解你會係度？」呢把聲，係阿芳把聲，佢拖住左兩個細路，一男一女。

「我……」突然面對阿芳，我都唔知講Ｄ咩好。

而佢身邊果兩個細路，就用好奇嘅目光望住我，然後問阿芳：「媽媽，佢係邊個啊？」

阿芳笑左笑後話：「你地兩個快Ｄ叫爺爺啦。」