[年齡無界限] 就係咁，我最近出席好多喪禮: １６０　我會點做（終於更新）

（各位唔好意思，因為最近公司實在好忙，所以成個星期都無更新，而家算無咁忙可以更新返，對唔住大家）

我腦入面仍然不停諗緊銅ＳＩＲ既回答，搵煙盒果個人有搵個佢，咁樣其實銅ＳＩＲ可唔可信？而搵煙盒果個人真係黑白兩道都咁有威力？

如果就同天語所講既一樣，我同小段以及珍妮而家要面對既究竟會係一個點樣既人？

諗到呢度我都唔想再諗。

「輝爺，其實你問我舅父呢個問題，係未因為怕我舅父佢……」小段問到呢到就無再問落去，而我都只係對佢笑左一笑話：「你就當我呢一個老人家多心多慮啦。」





如果天語咁極力阻止我地去追查呢件事，我諗我地自己都要好好留意住每一步，就算我地唔再跟落去都好，去到呢個地步，都已經無得返轉頭。

一黎我地有條片。

二黎我地都唔知有無人知道我地。

就係呢個時候，小段電話響起，我見佢望住個電話唔知點咁，就問佢：「邊個啊？」

小段回答：「係珍妮……唔知佢打黎做咩呢？」





接通，小段同佢傾左一陣後先收線，一收線後小段就嘆氣。

「睇黎你已經慢慢咁中左珍妮毒。」我講笑咁話，而小段卻係用一個認同嘅笑容回應我，「係，佢係一種慢性毒藥。」

「佢點啊？」我問。

「佢應該喊完，佢頭先打黎同我講，話佢暫時唔會再搵佢爸爸媽媽住，因為佢想先諗清楚自己，當面對父母既一刻會做Ｄ咩。」小段話。

「咁都好，佢平伏完心情先見返佢父母都係一件好事。」我話。





「係，再加上我地而家面對緊呢個問題，我諗解決左之後先再同珍妮去見佢父母會好Ｄ。」小段講完後，諗左諗問我：「輝爺，如果比你揀，你會將我地有條片呢個秘密比天語知地銅ＳＩＲ知？」

面對小段呢個問題，而家呢一刻我仲未知道點答佢。