[年齡無界限] 就係咁，我最近出席好多喪禮: １３０　救命恩人

係走廊入面，有把聲愈黎愈大聲，愈黎愈嘈，「無可能！醫生你係未驗錯啊！」果把聲我聽得出係小桃紅。

直到，一位醫生行入我所訓緊嘅房，直到我見到小桃姐仲係不停煩緊醫生，龍仔仲跟住佢身後。

「呢位先生已經接受左你個仔所輸嘅血，而且都醒返，一定唔會驗錯。」醫生好認真咁話。

小桃姐聽到醫生再一次將佢最唔想聽到嘅結果講比佢知後，佢只係用好兇狠嘅眼神望住我，然後話：「一定係搞錯！」佢只係講左呢一句，就衝左出去。

龍仔見到本來想跟住去，但醫生呢個時候問佢：「你阿爸剛剛醒左，你問都唔問下佢？」





只見龍仔只係嗤笑左一聲，咩都無講就走去追小桃紅，而醫生就搖一搖頭，「究竟呢個世代嘅人仲明唔明白咩野係孝心。」

「講得好啊，醫生。」珍妮拍晒手掌話。

醫生行到我床邊幫我撿查左一陣，然後話：「伯伯，好彩今次有人快手將你係架車度救出黎，如果唔係，你應該唔係訓係呢度架拿。」

「咁……咁救我果個人？」我問。

而醫生搖一搖頭話我知：「我唔知啊，我係其他傷者口中話有個南亞青年救左你出黎，然後佢就走左。」





我諗佢所講果個人，係阿里，佢而家唔單止救過細路祥，仲救埋我。

醫生做埋之後嘅野後就走左，剩低小段、珍妮同阿芳。

「……阿爸，你無事就好。」阿芳話，但我睇得出佢有少少不是味兒咁，可能係同先龍仔同小桃紅嘅出現令到佢咁。

為左打圓場嘅小段，係呢個時候就話：「我地黎果陣，芳姐已經係度架拿。」

「你地識左？」我問。





「係啊，輝爺。」講野嘅係珍妮：「講真，芳姐好過你果個龍仔多多聲。」

聽到珍妮咁講，我個心有一陣無名嘅內疚。