[年齡無界限] 就係咁，我最近出席好多喪禮: １２９　結果

張開眼，一個純白色嘅天花，我可以肯定我唔係屋企，好大陣藥水味，聽到一Ｄ機器運作嘅聲音，呢度，係醫院。

「輝爺醒左拿。」我聽到珍妮把聲漸遠，小段就係我面前出現，「輝爺你無事嘛？」

我應該點答小段呢個問題？

然後，我聽到我個女阿芳把聲，「阿爸，你訓左一日一夜拿。」

回想返，果日嘅車禍，我記得抱起我果個人係阿里，然後爆炸聲後我就眼前一黑……等等！果日龍仔係架小巴上面！





「龍仔呢！？」我問。

但唔知點解，珍妮聽到我咁講後反左一下白眼，而小段就答我：「你放心，佢無事。」

「仲擔心佢仲咩啊，果條仆街仔差Ｄ連自己親生阿爸都唔想救啊。」珍妮講左呢句我唔明嘅說話後，小段就叫佢唔好講咁多。

但係佢地兩個咁嘅行為，令我更想知道呢件事，「發生左Ｄ咩野事？」

而阿芳就話比我聽：「你送入黎醫院果陣，情況已經唔多好，醫生話要即時輸血，但你Ｄ血醫院血庫又唔夠，所以要搵人輸，果陣我剛剛到，但我又唔係你親生，我輸唔到比你……」佢講到呢到，有少少自責。





「跟住你個衰仔就到左，仲有你果位仆街前妻，我地將件事話左比佢地，叫龍仔去驗血睇下岩唔岩你用，個仆街前妻不停話龍仔唔係你親生，所以龍仔Ｄ血一定唔岩你用。」珍妮話。

而我聽完珍妮嘅說話，唔知點解，有一種鬆一口氣嘅感覺，「龍仔，原來真係唔係我親生。」我淡然講左呢一句。

但係，估唔到……

「緊係唔係啦，個醫生幫你個衰仔驗完血，醫生話你地係父子關係，Ｄ血岩用啊，你個仆街前妻接受唔到呢個結果，不停叫個醫生驗清楚Ｄ，仲唔想比龍仔輸血比你。」珍妮又話。

我呆左，「姐係……」





小段呢一刻拍一拍我膀頭，「龍仔真係你親生仔。」

估唔到，我會係呢一種情況下，知道龍仔係我親生。