[年齡無界限] 就係咁，我最近出席好多喪禮: １２６　買兇……？

「佢救過你？」我問，而細路祥就答我：「都係幾年前嘅事，果陣我剛剛出黎做保險，有次唔知頭唔知路搵著個黑社會傾保險，但我都係用保險係幫人嘅心態去同果個人傾，但點知到最後傾得好唔愉快，佢帶埋一齊去聽嘅人一聽到佢話要打我，全部人都即刻衝埋黎，但好彩果陣阿里行過，佢捉住我跑走。」

「跑左一段路果班人仲追黎，我本來都諗住呢次死緊，但係阿里嘅朋友見到佢比人追，個個都出晒黎幫手擋住Ｄ人，所以最後先無事。」細路祥講完後，就望一望我：「其實我都無諗過會比佢地救返，佢地一開始以為係我地呢Ｄ本地人特登打佢地嘅同族人先幫手，我知道之後都覺我好好笑，我竟然被岐視救左。」

我地三個聽到細路祥講嘅野，都笑左一下，而佢就繼續，「就係果次之後，我同阿里就識左，佢仲問我係未要開單，介紹左好多同族嘅朋友比我識同幫我開單，慢慢接觸後，發現其實佢地都好需要幫手，而且佢地好想自食其力，但係佢地無呢個機會，阿里，都係一樣……」

講到呢到，細路祥好似有少少黯然，而珍妮就追問：「佢點啊？」

細路祥繼續，「阿里媽媽有前排睇醫生，發現佢有絕症，其實而經醫唔好，不過阿里都不停搵方法賺錢去醫佢阿媽，佢果日約我出黎，係傾佢自己果份保險。」





「佢自己果份保險？」小段聽到向問。

「佢問我，如果佢點傷會陪多 Ｄ，佢咁問我果陣我其實已經覺得好怪，但當我見到佢好認真咁問我，我就知道佢計劃緊一Ｄ野，到佢親口同我講果陣，我知道我自己無能力阻止佢。」細路祥話。

「佢唔係想呃保險金掛。」小段話。

「犯法架ＷＯ。」珍妮咐和。

而細路祥搖一搖頭後話：「佢話做完果單野後，成功就會有好大筆獎金，但就算失敗，都可以有保險金比佢阿媽醫病，我有叫過佢唔好，但係佢話佢呢一種人，無得選擇。」





佢嘆左一口氣， 然後我地都跟住嘆一口氣，而我就問佢：「係未搶我份保險呢單野？」

「未玩啦，搶你保險邊會危險啊。」珍妮好直接咁話。

而細路祥好認同咁笑左一下後話：「唔係你果單，應該係佢果班人接左單買兇殺人。」

「買兇殺人！？」我地幾個聽到後好大聲叫左出黎，搞到講比我地知嘅細路祥嚇左一跳，「喂，做咩咁大聲啊……」

見到佢咁我地先察覺好多人望向我地……死火……點算好呢……





「買……買兇拍人！果套戲好好睇！」小段，你突然之間醒左咁多嘅，識得拎呢套戲出黎過關。

「係！買兇拍人呢套戲好好笑！」有睇過嘅我當然幫手講幾句啦，但係未睇過嘅珍妮……

「咩野買兇拍人啊？我未睇過啊？警匪片黎架？」我真係佩服得佢五體投地……