[年齡無界限] 就係咁，我最近出席好多喪禮: １０９　與南亞青年的對話

返到屋企，經過果位南亞青年屋企果陣，我特登係門口窺視左幾下，但可能我呢個舉動做得太過顯眼，屋入面一個本身坐係度處理緊菜嘅婦人望到我後，行左埋黎問……

唔好意思，我真係唔知道佢地講咩，所以無法話到比你地知。

不過見到佢係一個質問嘅表情，都知道佢地係問我望咩野，我只好尷尬地咁笑左幾聲後就返自己屋企。

唔知係未呢個青年搶走我份報告呢？

呢一個問題由一入屋果一刻就已經不停諗緊，我係屋入面提高警覺，一聽到有升降機門開嘅聲，又或者係有人打開門嘅聲，我都即刻跑去門口果邊偷偷睇下返黎果個人係未果位南亞青年。





但係，我而家內心係好忐忑。

原因，係因為頭先係回家路上，珍妮無意嘅一句話：「輝爺，其實份報告比個南亞青年搶左，都未上唔係件好事。」

「點解咁問？」我問珍妮。

「你本身都唔想知道個結果，份報告不嬲都係有得於無，咁比人搶左去都無問題啊，而且你前妻而家想拎份報告去屈人拎錢ＷＯ，你都唔想比佢架啦。」有時珍妮嘅直接，都係一個好處。

「喂，妳都未知輝爺前妻係未屈人就未咁樣話人啦。」小段話，然後就係佢地兩個嘅鬥嘴。





其實珍妮講得無錯，我其實好想份野會唔見，因為我一直接受唔到如果份報告寫龍仔唔係我個仔，就算我自己點樣講，一直都好怕打開份報告。

就係我諗緊野嘅時候，升降機門打開，我衝左去門口度望，係果位南亞青年，佢慢步行返去自己屋企，而我等到佢行到自己屋企門口前，打開門望住佢。

我呢個舉動可能你地會覺得好怪，係，我自己都覺得好怪，本來我想講多一句等件事無咁尷尬，但係我都諗唔到可以講咩。

但係，個南亞青年竟然開聲話：「你係未有野同我講？」佢呢一句說話係加上一個微笑，一個好意味深長嘅味笑。

我隔左幾秒後先開聲問佢：「係未你搶走左我份報告？」





果位南亞青年只係笑左一笑，無回答我嘅問題就步入自己嘅屋企，而又係同上次一樣，佢返到入屋企後，先講出佢想講嘅說話：「你估下？」呢一句帶有挑釁嘅說話，佢究竟係有搶我份報告定無？