[年齡無界限] 就係咁，我最近出席好多喪禮: ９７　血緣關係

我無答小桃紅呢個問題，等左陣佢又講：「其實都已經咁多年，你都唔肯睇份報告，又唔係跟我去再驗，咁點解當初你要提出去驗ＤＮＡ？」

小段同珍妮聽到佢咁講後，望向我問：「輝爺，原來呢個係你意思黎架？」

我點一點頭。

係呢個時候，龍仔拎左幾杯水黎，佢好有禮貌咁將杯水放到小桃紅前面，然後就是鬼但咁放低其餘果兩杯。

珍妮見到龍仔呢個舉動，當然好睇唔過眼啦，「估唔到咁大個人連基本禮貌都唔識。」





龍仔嗤笑左一聲，「無計啦，有爺生無乸教嘛。」

呢一句，珍妮唔知點反駁，但睇得出佢好激氣，然後不停打緊係佢旁邊嘅小段。

「喂，小姐，妳打我無用架ＷＯ。」小段無奈咁話。

「阿媽，你地傾完未啊？」龍仔問：「其實妳上黎要呢度，仲要同佢傾Ｄ咩野呢？」

龍仔呢一句，睇黎佢都唔知小桃紅上黎嘅目的係關於份ＤＮＡ報告。





然而，小桃紅同龍仔講：「龍仔，阿媽有Ｄ野想單獨同你阿爸傾，你帶Ｄ客人出去行下。」小桃紅對龍仔呢一句，係個命令。

本身剛剛坐低嘅龍仔又起左身，「喂，你地兩個聽唔到咩，我阿媽有事想單獨同我阿爸傾Ｄ野啊，你地仲唔跟住走。」

「喂！你夠未啊……」「你地跟佢去啦。」珍妮果句都未講完，我就同佢地講。

「咁……我地行開下先，一陣再返黎。」小段話，然後拉走想發嬲嘅珍妮。

佢地動作好快，而家就剩返我同小桃紅。





「份報告係唔係屋企？」小桃紅問，我搖一搖頭。

「咁你放左係邊？」佢又問。

而我無答佢呢個問題，反而問佢：「係未因為有龍仔可能係果個人個仔，你先咁急要果份報告。」

「緊係啦，果個男人咁有錢，我緊係要份報告黎證明你同龍仔無血緣暡關係啦。」小桃紅講得好理所當然。