[年齡無界限] 就係咁，我最近出席好多喪禮: ９６　小桃紅

飲完個茶後，銅ＳＩＲ因為要返警署做野所以做先，而我就驚返去果陣又遇到果個人，所以叫左小段同珍妮陪我。

「輝爺，其實你而家咁嘅情況，不如叫你屋企人陪你住啦，咁樣出入都有個照應。」小段話。

「係囉，今日就有我地陪你返屋企姐，咁聽日呢？後日呢？大後日呢？大大後日呢……」珍妮不停接落去，我同小段都聽到好煩，但你又唔可以睇少珍妮嘅恆心，因為佢竟然一直講到我屋企前先停口。

「大大大大大……大後日……呢？」珍妮講完呢呢後，指左指我屋企門口。

而我同小段都見到問口有個人企左係度……唔係，應該話係有兩個人企左係度。





果兩個人，一個係我個仔，龍仔，另一個人係我前妻，「……小桃紅？」

小段同珍妮望一望龍仔同小桃紅，然後珍妮開聲問我：「輝爺，你個衰仔黎左ＷＯ，企係佢旁邊果個係邊個黎架？」

我答佢地：「係我前妻。」

兩個人聽到後打互望左一眼，然後小段就話：「輝爺……咁而家你有人陪……我地係未……可以走？」

我下意識捉住左佢地兩個，「唔係，一場黎到都係客，入黎坐陣先走。」





「但係咁嘅情況好尷尬啊輝爺。」珍妮話，不過佢聽到我之後呢一句後，都同認留返落黎。

「陪我，我好耐無見我前妻，如果得我一個人都唔知講咩好。」我話。

就係咁，小段同珍妮就比我捉左入屋陪我，而當我行近龍仔同小桃紅時，龍仔都係以一貫嘅作風，「快Ｄ啦，天口熱啊。」

而小桃紅無出過聲。

入到去，我地五個人坐住左，「茶都無杯？」龍仔用不屑嘅語氣話。





而珍妮一直都唔係睇得我個仔順眼，所以就反駁話：「你咁大個人無手無腳嘅，你唔識自己去倒嘅。」

「我撚知Ｄ茶放係邊啊！」龍仔反駁。

「你咁大個人唔識自己搵下架！」珍妮都不甘示弱。

「夠拿，龍仔。」一直而來，龍仔都只會聽佢阿媽嘅說話，小桃紅講左句，龍仔都收聲。

「阿媽想飲杯水，你入去廚房睇下有無，倒多幾杯出黎比其他人。」小桃紅對龍仔話，而龍仔就死死地氣回應：「知道……」

當龍仔離開後，我就問小桃紅：「妳今次黎係為咩事？」

小桃紅望住我，毫無感情咁話：「你係未到而家都未睇果份報告？」