[年齡無界限] 就係咁，我最近出席好多喪禮: ６９　三萬

最後買左同一日出發去瑞士既機票，而珍妮知道呢件事後，就不停煩我叫我記得帶齊自己要用既野，因為到時候係無空閒時間睇住我……

我知道，呢個旅程，志威先係主角。

「你到時唔好有咩事發生啊，唔係我真係幫唔到你。」珍妮呢一句說話，每見我一次，就會講一次。

臨飛前一晚，我執好行李，執執下，電話響起，係小龍打黎。

係，又係借錢既電話。





「你快Ｄ拎三萬比我，一陣我ＳＤ過地址比你。」小龍話。

「仲咩無啦啦又要三萬啊？」我問。

「你未理啦，總之兩個鐘後要拎到比我啦。」小龍講完呢一句就ＣＵＴ左線。

而家我可以做既野，除左嘆氣，都係嘆氣。

夜晚晚，一個老人家行到落樓下已經關晒門既家坊商場，仲要係櫃員機拎左三萬蚊，你都未話唔驚。





驚咩？

緊係驚比人打劫啦！

不過上天就係咁玩人，平日唔諗就無野發生，今日一有呢個諗法，總係覺得背後有人跟住我咁……咦！？好似真係有人跟住我ＷＯ。

我加快我既腳步，而身後既腳步聲都由慢轉快，甚至已經係用跑既方法追向我，而我就好驚咁向後望……我都知你地會鬧我話呢Ｄ關頭你做咩野望向後面，但人既本能就係咁，係挑走前，總要望一望身後。

就係呢一下望一望，「係你？」原來追我既人係一班南亞裔人，而當中一個仲要係撞過幾次，就係上次我係小巴上面見過既果個人。





老人家，跑得慢係一定，所以最後都係比佢地追到。

「阿伯，唔好亂郁，你合作既話我地就只係求財，如果你唔合作，我地唔知會做左Ｄ咩野出黎。」我望住講野呢位南亞裔青年，而佢講完後望一望我果樣，「原來係你啊阿伯，上次累到我比差人追左幾條街，今次你無咁好彩。」

然後佢對住佢同鄉講左一Ｄ我唔識聽既野後，佢同鄉就開始摷我身上既野，當佢地搵到我拎比龍仔果三萬後，對眼發晒光咁笑。

「我身上面就係得呢Ｄ咋。」我話。

但係個南亞裔青年好似唔多信：「我地仲未摷完，你唔好咁多野講。」

示意繼續後，佢地又不停咁搵，好死唔死佢地發現到我褲袋入面既野，「呢個係咩黎？」

死火！同先拎左塊金牌出黎睇，順手放左係褲袋添！

佢拎左比佢同鄉望左望，睇佢地既眼神都唔會知塊牌係咩野黎，「照拎，拎去舉左佢都好。」





「唔好啊，你地比返我啦，呢塊牌對我黎講好重要架。」我話。

「重要！？咁就得啦。」南亞裔青年話：「聽日拎錢黎拎返佢，錢就……呢袋咁多啦，地點就……小巴站，我同你講你唔好玩野，唔係我齊爛塊野都唔會比返你。」