[年齡無界限] 就係咁，我最近出席好多喪禮: ５０　老公，我地下世再聚

蔡老闆嘅親屬，會坐靈車，而我地參加喪禮嘅人，會坐已經安排好嘅旅遊巴，去嘅地方，係喪禮最後一個地方。

呢個地方，我前之去過一次，就係果陣我所講，有個紅色制嘅地方。

係一個大靈堂門前，排左好多批人，果Ｄ人同我地都係同一個目的，目送走左嘅人最後一程。

愁雲……慘霧……

係呢一個地方，好似大家都默認左一件事，呢度唔係一個可以笑出聲嘅地方，不過總會有Ｄ入世未深嘅小朋友，好似唔知發生咩野事咁四圍走。





佢地最後可能會被鬧、會被打、又或者會有個大人行出黎講一個故事嚇佢地。

而蔡老闆個仔行到我同阿然嘅面前，「辛苦你地兩位。」

「傻啦，蔡老闆係我地嘅好兄弟，佢嘅最後一程，我地一定要幫。」

入到大靈堂入面，工作人員再三確定資料後，各位就行到大靈堂嘅前面，係呢度，有個位比人放先人嘅遺照，而係左手邊，就有一條放左一副棺材嘅輸送帶，輸送帶旁邊有一個紅制。

而輸送帶上面果副棺木，就係蔡老闆嘅棺木。





做最後嘅行禮，然後，一位工作人員行到蔡老闆前妻同佢個仔前面，講左幾句後，佢地兩個行左去個紅色制旁邊。

蔡老闆前妻一路行過去嘅時候，都喊得好利害，甚至好似差Ｄ暈咁，好彩佢個仔扶住佢。

而我地就望住佢地兩個按下呢個紅色制，輸送帶啟動，蔡老闆嘅棺材慢慢移入去一個有黑布遮住嘅入口。

呢一段，就係佢人生最後一程。

「係未入到去就火化啊？」我又問企係我旁邊嘅小段，而小段佢搖一搖頭話：「入到去後，會有地方先安放蔡伯伯，然後排期火化，通常都一個月之內可以火化。」





蔡老闆前妻同佢個仔望住副棺木入去，而佢前妻就一路喊，一路話，「老公好走啊……下世一定要再同我一齊……老公……我地下世再聚……」

沒有今世，哪有來生，哪有下世，其實試問有幾多人真係知道下世可以再聚，但講出呢Ｄ說話嘅人，都可以好肯定一件事，就係佢心中嘅不捨，用今生嘅思念已經不足夠，希望可以預用埋下一世。