[年齡無界限] 就係咁，我最近出席好多喪禮: ４０　保償

同蔡老闆見完工，更係要報喜啦，「邊位？」而家Ｄ後生真係無咩禮貌，「我啊，輝爺啊。」

「喔～阿伯啊……」佢幾時先肯叫我個名……「搵我咩事啊，又有朋友想搵工啊？」點解呢個珍妮講野可以一直咁理所當然。

算，見佢幫蔡老闆搵左份咁好嘅工，我唔同佢計，「無啊，想話妳知我位朋友見成左妳比果份工，佢話遲Ｄ想請妳食飯多謝啊。」

本身我仲諗住佢聽到我咁講，點都會客氣Ｄ話唔駛，但估唔到佢會話：「緊係要啦，個個見得成工嘅人都會請我食飯架，你朋友唔係唔請掛。」

無言……又一次肯定珍妮係一個與別不同嘅年青人……定係所有年青人都係咁？





「……咁……咁等佢第一個月出糧後我再搵妳啦。」我真係無呢個珍妮咁好氣。

「好啦，無其他野嘅話就再見。」珍妮……永遠都咁珍妮。

我聽完呢個電話，唔知點解有一種莫名其妙嘅感覺，好似想搵個人打一樣。

打完比珍妮，我就打比阿然，「老野，今晚有無閒啊？」

「有啊，死老野，係未黎飲酒啊？」阿然問。





「係啊，順便講個好消息比你知。」我話，而阿然已經不停問有咩野咁神秘，不過我都忍到唔講佢知住。

直到，夜晚去到佢間夜冷店，我將個消息話左比阿然知。

「真係！咁就好拿！以後蔡老闆就唔駛再咁辛苦。」阿然聽到個消息都替蔡老闆開心。

不過，我就同佢講：「可能未必，我諗佢有呢一份工，佢都會繼續以往嘅工作，因為佢講左一樣野我知。」

阿然聽到我嘅說話後，半懂不懂望住我問：「係咩事？」





「蔡老闆話供果一份保險，係一份救犢。」我話。

「救犢？」阿然重覆左我所講嘅呢兩個字。

我嘆左口氣，然後將蔡老闆話比我聽嘅事講左一次佢聽，阿然聽到後，頭先果種開心頓時無晒，「估唔到，蔡老闆咁重情重義，而佢前妻，原來都付出過咁多。」

「嗯。」我點一點頭。

人永遠都係自私，但總有某段時間，呢Ｄ自私嘅人會做其他人眼中覺得佢地唔會做嘅野，無私嘅分享，因為人總會係某個時間遇到一個直得為佢以放棄自己一切嘅人。

就好似蔡老闆嘅前妻，曾經為左佢地美好家庭做出錯嘅行動，而呢一種恩情，蔡老闆永遠都覺得自己欠左佢一樣，佢欠前妻嘅尊嚴，所以佢想好好保償。