[年齡無界限] 就係咁，我最近出席好多喪禮: ３３　存酒

阿然講完佢想講嘅野後，我地兩個都靜晒，拎起酒杯，碰左一下杯後，互相嘆左啖氣。

「蔡老闆所做嘅野，佢前妻知唔知？」我問，而阿然搖一搖頭。

點解？點解蔡老闆要咁做？佢每日咁辛苦做野，就係為左咁？

「我有問佢點解要咁辛苦，但係佢每次都係笑左幾聲後，叫我唔好再問佢，話佢好明白而家自己做嘅野。」阿然同我講：「所以我只可以由其他途徑去幫佢，每晚呢度都會有好多爛銅爛鐵，可以比佢拎去賣，就當，幫輕下佢。」

「唉……佢始終過唔到尊嚴呢一關，上次本來想比Ｄ錢佢，佢已經好理直氣壯咁同我講唔要我Ｄ錢，我話請佢食飯，本來佢都想拒絕，只係我快手埋左張單，佢仲話下次要請返我食飯。」我話：「我都好想幫佢，所以叫左個識得嘅人幫佢搵工。」





我地講完後，互相笑左一下，「我地可以做嘅，只係得咁多。」阿然話，而我好認同佢嘅講法，點一點頭。

「你今日叫我嚟，就係因為呢件事？」我問阿然。

「係啊，多個人知道好Ｄ嘛，而且，你同蔡老闆咁熟，知多少少，就唔怕係佢面前講錯野。」阿然笑住咁答我。

「咁又係。」飲埋杯入面最後果啖酒，阿然想再倒少少比我，但係比我叫停左，「唔要拿，我夠拿。」

「唔係掛，你以前人稱酒筲箕，飲唔夠十支你都唔會話停，而家飲左一杯就話夠。」阿然雖然口就咁講，但係都收起左支酒。





「果陣時點同呢，而家上左年紀，自己知自己事，你都未飲咁多添啊。」我話。

「我都係見你嚟，同你飲一兩杯咋。」佢笑住拎左張將出嚟，寫左我個名後貼左上支酒度，「你搞咩啊？存酒啊？」

「係啊，貼起佢，等下次再同你兩個吹水果陣，再拎出嚟飲。」阿然將支酒放左係佢身後嘅架上面，而個架上面，已經放左好幾支酒。

「有咁多酒存起嘅？」我問。

「係啊，全部都係Ｄ老友嚟吹水果陣，我開嚟一路吹水一路飲，講真，我地都已經幾十歲人，好話唔好聽都已經聞到棺材香啦，有幾何可以坐低吹水，想下當年，每次朋友見返話就話得閒飲茶，但有幾個真係做得到先得架。」阿然講完，就望一望身後嘅酒，「本來仲有好幾支架，但係人真係好化學，走下一個，走下又一個，每次Ｄ老友走左，而我呢度又有佢嘅存酒嘅話，我都會開出嚟飲晒佢。」





呢一種，都係一種懷緬。

「咦。」我望住Ｄ存酒，見到蔡老闆嘅名，「蔡老闆支酒都飲得幾快架ＷＯ。」

阿然聽到後，望住蔡老闆支酒笑一笑話：「緊係快啦，佢住附近，我地差唔多一個星期見幾次，一定快架，第十六支酒架拿已經。」

「十六支！？」竟然飲左咁多？

「放心啦，我地每次都只係飲一杯仔，因為成日見先飲左十六支姐。」然後，阿然語重心長同我講：「兄弟，我都好想同你開到十六支酒以上架。」

我聽到佢咁講，好耐都無打從心底咁笑左出嚟，「可以嘅，一定可以。」