我每星期都會去摩星嶺同佢啪啪啪: 十一

【上文提及】
Alex表明佢「靈界巡警」嘅身份之後，用左好多奇怪嘅方法說服我相信佢，甚至俾我睇返佢地六個喺廢堡二樓嘅時候究竟發生咩事。出奇地，我見到嘅唔係本來預期嘅做愛場面，而係Natalie粗暴咁同肥仔西注射。成件事實在太無稽，我始終唔相信Alex。就喺我想走嘅時候，Alex話如果我之後想佢幫手嘅話就返摩星嶺揾佢，之後我就失去左知覺……

【我每星期都會去摩星嶺同佢啪啪啪 - 十一】
咦？呢度係邊度？周圍黑色一片，我乜都見唔到……唔係！前面好似有個人喺度……我認得佢，係Alex。
Alex：「唔洗驚，我淨係講多句姐。你兩個frd唔知廢堡二樓嘅事，所以佢地最多會以為自己生痔瘡。我都唔想佢地咁辛苦，所以送你返屋企之前擺左兩盒藥膏入你褲袋。可以嘅話，唔該你幫我俾佢地。」
講完之後，Alex就唔見左。

「阿文……阿文……」
呢把聲……好熟。


「醒下啦，文！」
係媽子！我聽到阿媽把聲，咁即係話……
「媽呀！！！」我一大嗌，個人就醒左。
呢度係……我間房？
文媽：「Thanks god你終於醒啦！嚇死我地啦！」
我瞓喺床上面，望住坐喺床邊嘅媽子，完全俾唔到反應……
文媽：「你冇嘢呀嗎？你老豆趕返緊嚟，一陣就車你過港安（醫院）嗰邊check check。」
文：「下……我冇事喎，唔洗咁誇張啦！」
文媽：「冇事？你瞓左成日，Emma（菲傭）叫極你都唔醒都仲話冇事？我打左電話俾Dr. Ho，佢今日都喺司徒拔道呢邊，你一到佢就會嚟睇你……」
文：「我瞓左成日？」


文媽：「係呀！本來以為你尋晚唔返嚟瞓，點知你老豆話尋晚沖完涼兩點幾已經見到你瞓到成隻豬咁。今朝我地返工之後，Emma見你仲未起身就諗住叫你起身食早餐，但係你叫極都冇反應，佢見今日係星期六所以就由得你繼續瞓。到六點幾我就收到Emma電話，佢話佢叫左你好多次，但係你都仲未醒……」

老豆返嚟之後，就同我同媽子一齊去左醫院，Dr. Ho幫我檢查完之後就話我冇乜大礙，應該只係平時唔夠瞓同睡眠質素差。跟住，阿媽都係照舊問左一大堆問題。聽完Dr. Ho咁講，我就諗……睡眠質素……會唔會啱啱嘅事，其實只係我嘅夢境？
文：「咁發夢係咪代表睡眠質素差？」
Dr. Ho：「當然都啲有關係嘅……」
文：「咁我想問下呢……即係……會唔會有啲情況係瞓醒之後會以為自己係真係經歷過某啲嘢，但係其實只係發夢。」
Dr. Ho：「都唔係冇可能嘅……文仔，平時見你都唔出聲㗎，今日好多嘢問喎！」
文：「哈哈！好奇姐……」

雖然Dr. Ho檢查完之後話我冇事，但係屋企人就始終唔放心，叫我喺醫院留一晚睇睇第二朝情況點。搞完曬啲手續送埋我上房之後，老豆同媽子就返左去休息，準備星期日再嚟睇我。終於，成間房得返我自己一個。我坐左喺張床度，腦入面不斷loop住摩星嶺、廢堡，同埋佢地啪啪啪嘅畫面。我好認真咁問自己，究竟呢一切係咪真係一場夢？忽然間，我醒起自己喺摩星嶺曾經what$app過Kenson同傻仔西。冇錯！只要check返啲record咪知囉！我即刻開what$app再㩒返入去我地個group度，一路睇返我地啲msg……


[07:13pm]西：唔記得今晚要同親戚食飯
[07:13pm]西：join唔到你地上摩星嶺sor
[07:22pm]Kenson：😑
[07:23pm]Kenson：唔齊人不如下次先去？
[07:31pm]文：okok
跟住就冇人再講過嘢。咁即係，我應該真係發夢……

我總算鬆口氣，飲啖暖水之後就準備瞓。由於換左衫嘅關係，我就喺個櫃度拎返自己條褲出嚟，諗住喺褲袋度攞返個耳機出嚟用。但係，我伸隻手入褲袋入面，摸到嘅除左有耳機之外，仲有兩盒嘢同一張紙。我攞曬啲野出嚟，嗰兩盒係普通醫療用嘅藥膏盒，而張紙上面就寫住：from Alex。