我每星期都會去摩星嶺同佢啪啪啪: 八（修飾刪減版）

註：本文為修飾刪減版，刪改原文中的成人情節。

【上文提及】
坐喺度抖左一大輪之後，我自己起返身。當我諗住上二樓鬧爆嗰二個衰仔嘅時候，我俾一幅確確實實存在嘅隱形牆阻擋左我嘅去路。無論我嘗試用咩方法都好，我都係上唔到二樓。就喺呢個時候，我見到二樓入面竟然有六個身影喺度--有Kenson，傻仔西，Catsy，Natalie，細芳，同埋我自己。

【我每星期都會去摩星嶺同佢啪啪啪 - 八（修飾刪減版）】
望住二樓嗰個同自己一個餅印咁嘅「人」，我真係嚇到成個人企左喺度……
「妖你鹵味乜L嘢事呀仆街？」
而家嘅情況就好似我每晚開電視都睇到做完愛·回家咁，唔怪得句粗口對白咁熟啦！雖然係膠左啲，不過我都係選擇繼續睇落去，因為呢套劇係非一般嘅CCTVB膠劇--「我」有份拍呢套戱。



我放低支電筒落地下，再set好個位照向佢地六個。雖然唔太光，但係我都可以勉強見到佢地喺度做乜。不過老老竇竇，唔洗睇都知跟住嘅情節--兩條飢渴左咁多年嘅男校仔咁難得有機會溝女，最起碼都傾返一個半個通宵再順手抄埋個牌啦！但係再睇落去，佢地好似唔只喺度吹下水，hea下咁簡單。

過左十幾分鐘之後，佢地喺原本坐緊嗰度行左去樓梯左前方嘅位置--雖然冇門，但係都睇得出原本嘅設計係一排五間房。因為唔夠光嘅關係，佢地行左去嗰邊之後，我已經睇唔清楚佢地個樣，淨係見到佢地好似分左組咁，兩個入一間房。
「呢班人唔係咁大個仲搞埋喲咩麻雀捉雞乸、捉迷藏嗰啲低能game啊？」
佢地入左房之後應該都將支電筒放定喺某個位（或者甚至乎係向天照），所以就算見唔到佢地啲樣，我都可以靠映射喺牆上面嘅影子知道房入面嘅情況。

「嘩妖，唔L係挽到咁激呀？」
我真係唔係好敢相信我見到嘅嘢，但係我確確實實係望到房入面嘅兩個黑影有不尋常嘅身體接觸。咁樣都仲唔夠，房入面嘅黑影仲有進一步嘅行動--如果我冇睇錯嘅話，佢地應該喺入面做愛。

我真係冇眼睇落去，最攞命嘅係其餘兩間房嘅情況都唔好得去邊。咁搞法都唔知會唔會搞出人命，而且仲要唔只一條，一個唔該搞左三條人命出嚟就真係大檸樂啦！唔係喎，嗰三個女仔同我地一樣都係中學生，即係好可能都未夠秤……


「萬一真係搞出人命嘅話，咁Kenson同傻仔西兩個咪……唔只佢兩個，我差啲唔記得仲有個假嘅『我』都喺二樓同條女扑緊嘢，即係我地三個都會衰十一！？」
唔得！我唔可以俾呢件事發生嘅！真係出事嘅話，Kenson同傻仔西就話抵死姐，但係我--唔好話扑嘢，我成晚女都冇掂過！我決定要阻止佢地，不過講就容易，實際上應該點做？

突然間，我諗起附近除左我同二樓嗰六個之外，廢堡出面仲有其他人喺度--消防員。只要我同佢地講廢堡入面著左火有人被困，引班消防入去，喺二樓仆緊嘢嗰六個聽到有人上緊樓就自然會收手啦！於是，我即刻跑落樓走出廢堡，但係落到去已經唔見左班消防。
「香港消防員啲效率真係高，啱啱仲噴緊水，咁快就救完火仲走埋，不過佢地應該唔會走得好遠。」
我冇諗咁多就開始沿住入嚟嘅唯一山路跑出去，諗住追返班消防。

跑左十幾二十分鐘我都仲未追到班消防員，雖然平時都有練開跑，但係全速跑咁耐，我都攰到要停低抖下。班消防員都唔知係咪人嚟嘅，洗唔洗走得咁Q快呀，救完火收返條喉都要時間㗎…… 唔係喎！荒山野嶺拉乜鬼嘢喉呀，唔通真係喺馬路駁街喉拉入嚟咩！我真係唔明點解自己咁白痴嘅，睇新聞都成日見啦，救山火係會派架直升機喺半空灑水㗎嗎！

我唯有7下7下咁行返去廢堡，再諗諗有冇其它辦法。可能係我跑出去嗰陣太心急，冇乜留意條山路，但係一路行返去我就越黎越覺得唔妥--點解條山同隔離的花草樹木全部都係乾嘅？返到廢堡前嘅草地仔，我成個人企喺度呆左。唔只附近一啲都唔濕，更大鑊嘅係--成幢廢堡唔見左，得返幅爛地喺度……