【英雄系列6】孤獨兄弟: 10

10.

叢雲同阿白一路向下走

「阿白，如果我地搭客lift，可能會比人發現...我地搭貨lift啦」

「嗯，叢雲你點決定我都會信你架」


叢雲成功於下層搵到貨物用既升降機，跟阿白落到大堂





但同時，大堂已經佈下迪拉斯既人馬


兩人躲響通往大堂既門後

「弊，果個渡邊雄介已經叫哂增援包圍呢度」叢雲心裡不斷思索解決方法


「彌生，你地響邊呀？」





「我同小優bb豬響後街呀，你救返阿嫂未呀？」

「救返啦，但我地依家響對面既Cosmic Building大堂，大堂入面全部都係迪拉斯既人」
「所以，我想你一陣衝入黎大堂..而我同阿白就乘機走」

「得啦，掂過碌蔗啦，一陣見！」


「阿白，一陣你要做既野，就係跟住我跑..」叢雲冷靜地講解:「我細佬一陣會揸車衝入黎，到時我會拉住你，跑出去」





「嗯..」阿白除下高踭既新娘鞋，準備一會既狂奔


兩個迪拉斯守衛，慢慢行近兩人身處既大門

「阿白..唔好講野..」叢雲將手指講響嘴前，阿白亦用手掩住口點頭


「可惡..兩個既話好難隱密咁殺哂佢地....彌生，你快d到啦」




「砰！！！！！！！！」





一輛七人車衝破玻璃，撞入大堂


「射佢呀！！！！」

所有既迪拉斯人員都被吸引，集中火力對付呢架七人車

七人車亦馬上倒後


「彌生，做得好呀！」

叢雲一手捉住兩個迪拉斯守衛，用豬肉刀將佢割喉






「阿白！！走呀！！！」

叢雲拉住赤腳既阿白，突破包圍網


幸得彌生吸引住迪拉斯人員，叢雲同阿白都可以順利衝出大堂

到迪拉斯既人發現時已經太遲



「叢雲上車呀！！！！」

兩人打開七人車門上去，彌生亦醒目馬上開車







「呼，好彩！」抽住煙既彌生笑道:「叢雲，你又差我一次人情啦！」

「哈...今次你威囉..」疲勞過度既叢雲攤響度坐上道


「呢個..就係叢雲你既細佬啦？」阿白問

「你好呀阿嫂！我叫望月彌生，係叢雲個細佬」彌生指住隔黎既小優:「呢個就係我女朋友小優bb豬啦！」

「都話左唔好叫我咩bb豬囉！」小優點頭:「你好，我叫游小優，都係因為比迪拉斯追殺，所以先跟住彌生咋」

「hello，你地好呀，我叫白小靈，你地叫我阿白得架啦！」







彌生笑道:「呵呵，成日聽叢雲講起你，原來阿嫂真人都幾靚架喎，十足十d女明星咁！皮膚又白，唔怪之得我個木頭大佬鐘意你啦！」

「專心揸車啦你！」小優氣道:「一陣迪拉斯既人跟住黎就麻煩啦！」

「嘻，小優bb豬你見我係咁讚阿嫂，緊係呷醋定啦，咁我讚下你囉！」

小優臉紅道:「邊..邊個呷你醋呀？我先唔想比你讚呀！」




「呃呃呃呃！！！！！」

三架印有迪拉斯logo既重型裝甲車，從街角轉過黎，逐步逼近


「睇下，話口未完就追到黎啦！」小優大叫

彌生從袋中拎出配槍及手榴彈:「放心啦，定過台油呀！」

小優馬上縮開:「手....手榴彈？！」


彌生將手榴彈拋向隔黎，再用手槍將手榴彈射爆



「轟！！！！」

爆風將裝甲車炸開，撞向另政邊

彌生亦扭動軚盤，轉出大街


剩低既裝甲車亦緊隨其後

「仲有兩架響後面呀呀！！」小優緊張地叫


裝甲車車頂既機關槍開始掃射

一行人駕駛既七人車車窗馬上被射爆

「趴低呀！！！！」

四人馬上低頭避過槍擊


「仆街，唔發火當我病貓！」

彌生上好子彈，道:「小優bb豬，一陣段直路，你幫我揸住油，揸緊軚盤呀！！」

「...彌生你..你想點呀！！！」


七人車轉入大直路

「我去啦！！！」彌生爬上七人車車頂


彌生瞄準裝甲車既駕駛員

「要解決呢種程度既防彈玻璃，就一定要響同一位置使出triple tap，用後面兩粒子彈將第一粒子彈打入去！」


面對裝甲車既槍擊，彌生集中精神



「係呢度啦！！！」彌生以神速既手指扣下板機



「砰！砰！砰！」

三粒子彈以同樣位置，就好似連體嬰一樣打穿防彈玻璃，射中司機既頭顱

裝甲車馬上失控，橫腰衝向另一架車，再撞去旁邊既街道上



「嗚呼！！！！一箭雙雕，掂呀！！！」響車頂上既彌生得意洋洋道

下面既小優卻尖叫:「彌生！你落黎先啦！！我唔識揸車架！！！！」


「係喎哈哈，唔該哂你呀小優bb豬！」彌生接過軚盤，飛快地駛出公路