你愛我還是他: 第七十四章

開學後，我和芷怡的關係也開始變回從前般親近。在對比過二人的時間表後，我們都共同定出一些見面的時間。今個學期，芷怡說即使再辛苦，也要多過來陪我，補償暑假的空缺。
.
而我的一班好同學，亦已經習慣了芷怡的出現。
「咦，呀嫂，又黎等呀駿放學呀」一出班房城城就說
「又話趕時間走既，仲係度講咁多野」我反駁
「唉，有人接放學真係幸福喇，可憐我地呢啲單身狗，囡又無，太陽眼鏡又無…」
「係咪仲要講呀？呢度有碌好粗的柱喎」
「得，我走！呀嫂慢慢喇」
.
「等左好耐喇？」




「唔係呀，一陣咋麻，順便做下野」
「想去邊呀？」
「冒險樂園！」
「正一細路女，好喇，我地出發喇！」
.
由於冒險樂園所費不菲，所以芷怡每次都很節制，一開始就限定自己玩多少個代幣，玩完就走。在暑假期間賺了兩個多月錢，加上自己平時花費少儲錢多，所以也有點餘錢可以和芷怡一起拍拖用。
.
「係呀，我聽日要去攝影學會個宿營，星期六下午先出黎」
「但你聽日唔係有堂咩？」
「我唸住走左佢呀，反正都係基本野」




「下…乜你咁架，咁曳曳豬架你，自己小心啲喇」
「但係呢…」她欲言又止
「做咩呀？」
「佢都會去…」芷怡口中的他，我當然知道是誰
.
我們沉靜了很久，就在冒險樂園門外站了足足一個杯麵的時間。
.
「可唔可以唔去？」
「我地無野架，又唔會同房」
「可唔可以唔去？」




「但我真係想去呀」
「即係唔可以唔去喇」
「我應承你呀，我會盡量避開佢，唔俾機會佢同我講野」
「我唔係唔信你呀…我係信唔過佢呀…」
「無事架，我對佢都無野，唔會有咩事發生架」
「算喇，就算我再唔鍾意，再反對，咁有用咩？你最後咪又係會照去」我淡淡的說
「我應承你呀，我會自動自覺同你報到，我淨係想同其他朋友一齊玩番晚」
「嗯，自己小心啲喇，走喇，番屋企」我極平淡的說
.
這一次，是我們復合後意見最不合的一次。之前無論發生甚麼事，我都會盡量後退一步去讓她。我不想令她不開心，我不想因為一些瑣碎事而跟她吵架。
可是今次，請原諒我，我真的一步都不能退，因為我知道如果退了這一步，我就可能會失去了你。不過縱使如此，我還是沉默地妥協了，我沒有再諸多阻攔。始終即使我想阻止，也不會改變到甚麼。
.
「我入營喇，星期一見喇」
「自己小心啲喇，唔好玩到咁夜」
「我會架喇，你都要小心呀，我一有時間就會同你報到架喇」




.
結果，我還是讓她去了，而這件事也曾經成為我最後侮的事。那個晚上，我一直沒睡，一直在等她的訊息。可是，自她跟我說食完晚飯準備回房後，就再沒有上線…
.
Facebook：微言
Instagram：smallpotatosay