你愛我還是他: 第三十七章

「原來你係度呀，我搵左你好耐喇，頭先見唔到你搞到我幾擔心，幾驚你衝左出校外！」
「朱sir，我好辛苦呀！！」我哭得更大聲，更痛
「無事既，喊完無事架喇」朱老師輕輕地拍著我
.
過了不知多久，我才慢慢收起哭聲，停住眼淚。然後，我才發現我的上衣不知不覺間已濕透…
.
「黎，食舊朱古力先，補充一下」
「唔該朱sir…」
「其實我一早就知你會出事，所以先特登入禮堂監考」
「你知？」




「你上次就係喺呢科失手，所以今次一定會俾自己好大壓力」看來，他還未知道真正的原因
「係喎，個考試…」
「我會幫你爭取補考架，唔洗擔心」
「唔好呀朱sir，呢個係我應該承擔的責任」
「但你係受病影響先至咁，同埋如果你唔補考，你平均分會被拉低好多架！」
「咁都無計，唔係你就唔係你…」
.
坐多一陣後，朱老師就帶我回到校務處。
「朱sir，我地黎校務處做咩呀？」
「等陣你就知」




.
等了一會，才發現原來我們要見校長…而且，一進校長室，第一眼看到的，竟然是…媽媽。
.
「媽…點解你會係度架？」
「係我叫你媽媽黎，我覺得嚟到呢個時候，你唔可以再暪住佢喇，佢係時候要知喇」朱老師說
「究竟你地講緊啲咩？朱sir我有咩要知架？」媽媽問
「司徒太，唔好咁緊張住，我同社工華哥跟住會慢慢解釋你聽」
.
接下來，朱老師就跟媽媽細說我近幾個月遇上的問題。媽媽愈聽面色愈緊，不斷捉緊掌心，後來我直接捉住她的手。之後，就輪到華哥說出他的初步判斷和為我準備的跟進方案，先會去見臨床心理治療師，再排期見精神科醫生。
.




「咁…我個仔會唔會有咩事？」媽媽緊張地問
「放心，我相信呀駿咁堅強，唔會做傻事既」朱老師說
「係呀司徒太，你可以放心，學校會加緊留意司徒駿同學的情況，並且給予支援」校長說
「咁麻煩哂喇校長同咁多位老師…」
「咁司徒太可以同司徒駿番屋企先，係呀，司徒駿，補考方面…」
「校長我唔需要補考」
「點解呢？」
「我唔想對其他同學唔公平」
「但係…」
「我明白後果，但我應該去承受」
「咁好喇…」
.
「司徒太，不如我車你地番屋企？」朱老師問
「唔使麻煩喇，我地搭巴士番去就得」
「其實我想順便做個家訪，唔知方唔方便呢？」




「咁…麻煩哂你喇朱sir」
.
回到家後，媽媽就叫我先回房休息，好讓她向朱老師問個明白。
.
媽媽有她的問題，我也有我的問題。回房後，我拿起手提電話。看看有沒有人找我。
.
結果，真的有人找我，但卻不是我想要的她…
「你好煩呀！」真的是我的問題嗎？
.
我還是忍不住發了個訊息給她
「我好掛住你，我有好多野想同你講」
.
Facebook：微言
Instagram：smallpotatosay