海外研究生的日常生活: Jan 11, 2017

今日有另一間大學嘅guest speaker, 黎分享佢嘅研究項目，我覺得都幾有趣。 佢嘅研究題目係關於正面情緒如何影響一個人嘅身心健康。佢今次個presentation focus 係敬畏 (the feeling of awe) li 一種情緒。 根據佢嘅研究，人通常會感到敬畏，係因為佢地見都一D 好宏偉嘅景象，或者見證到有人做左一D 能人所不能嘅事情。例如，當你去美國大峽谷，睇到大自然嘅深淵，或者近距離睇瀑布，好多人都會有一種覺得自己好渺小，一種好佩服嘅感覺。而li 種感覺，可以稱之為awe。 個speaker 覺得li 一種正面情緒，可能會好似其他正面情緒（例如開心）一樣，對人體有益處。當中佢指出現有嘅support 有好多，我就唔多講了，因為如果要講，應該用一萬字都未講完。Anyways，佢用唔同方法研究（例如，用日記形式，follow 人地每一日感受到敬畏嘅程度同次數，同身體嘅反應有冇關連）。最後發現，當人感覺到敬畏嘅次數越多，身體裡面其中一種叫做 IL-6 嘅物質就會相應減少(Stellar et al., 2015) 。而li 種 IL-6 如果長期係身體有好多嘅話，就會有唔好嘅影響。即係話，敬畏會通過減少 IL-6, 對身體有正面嘅影響。 套用番係日常生活，li 個發現話俾我地知，我地如果可以多d 感受到awe li種情緒，咁我地身體就可以健康d啦！點樣感受awe? 我相信去多D 地方，見識多D 震撼嘅野，例如睇下日出，流星雨，或者透過旅遊睇下自然奇觀同文化遺跡等等，都應該會感受到awe。古人崇尚四處遊歷，見多識廣，睇黎當中有大智慧。佢講完個talk 之後，就同大家傾下計。原來，佢讀完PhD 之後，未做professor 之前，曾經係出面嘅公司做過。再細傾落去，原來佢都好有恆心，一直堅持佢想研究嘅題目。就算有時遇到困難，佢都冇放棄，最後如願以償俾佢做到professor 。 「你點樣知道自己真係想做professor ？而又點樣堅持到落去呢？」有人問。 「其實當你感覺自己所做嘅野，由心底裡覺得係值得，就會知道自己真係想做咩，同埋堅持到。」佢話。 佢講完，我地大部分學生都立刻陷入沈思。當我地一直忙碌工作讀書嘅時候，到底仲記唔記得要退一步，感受一下做野帶來嘅樂趣呢？ 至少，我依家都仲好enjoy 去為我嘅research 去忙碌。

Stellar, J. E., John-Henderson, N., Anderson, C. L., Gordon, A. M., McNeil, G. D., & Keltner, D. (2015). Positive affect and markers of inflammation: Discrete positive emotions predict lower levels of inflammatory cytokines. Emotion, 15(2), 129.