海外研究生的日常生活: Jan 10, 2017 (2)

今日同Michael 傾計，令我初次感受到Grad School嘅徬徨感。大概6點，天色已經全黑（冇錯，加拿大冬天係5:00 pm 就天黑），office 裡面嘅人所剩無幾。當我依然全神貫注咁讀paper 嘅時候，Michael 走來我office 。 「喂，我想問下，你對我有咩意見？」Michael 問。我心裡面即刻好困惑，我做左D 咩得罪佢嗎？ 「我意思係，你同我一齊上堂，聽過我present。我想問下你有冇feedback 可以講俾我知，等我可以改善一下。」Michael 立刻解釋。大概大家都忙左一日，所以心裡面諗嘅，同講出來嘅野，有時候會因為太疲累而有出入。 「哦！哈哈，我仲以為有咩誤會。我覺得你好好啊。Present 嘅時候好清晰，而且present 嘅論點都好有趣。」我回答佢。 「多謝。不過你有咩建議唔好怕提出啊，我真心相聽。」佢好真心咁講，令到我開始認真再諗。 「其實有一樣，不過只不過可能係我自己習慣左嘅present 風格同你有所唔同。我鍾意將比較難明嘅idea 講左先，然後再解釋個idea 嘅意思。不過你習慣將同一個idea 分拆成幾句講，用每一句解釋每一part。我一時唔太習慣，所以有時候要好用神先組織到整個idea 去明白你。」於是，我就以比較圓滑嘅方式，講俾佢知，有時候佢將一句說話拖太長，搞到要好用神先聽得明白。 「阿！我又冇留意我li 個特點。好！多謝你嘅feedback 。」 「其實都唔算feedback，只不過我自己嘅一個observation 。」既然佢問我feedback，我就當然禮尚往來，問一下佢對我有咩feedback 啦。 「其實呢，我有小小懷疑我工作嘅進度究竟算唔算正常，還是算太慢。」於是，我將我工作嘅分配大概講俾佢知道。我每日工作大概8個鐘，一個禮拜有6日都會做野，所以一星期大概48 小時係做野的。現今有1個project 將會推出，有另一個project 係籌備中，所以好多時間係做緊literature review，盡量睇有關於個project 有關嘅文獻，從而去策劃細節。Research 以外，就係兩個courses 嘅workload，同埋至今都未有太大workload 嘅TA 助教工作。除此以外就係lab meetings 嘅時間。 「其實都差不多啦。不過我自己就可能會花時間再籌備多一個project 。不過li 樣就要你同你professor 討論啦。」Michael 答。其實我自己都想咁做。不過每個人進度都唔一樣，加上要籌備一個新研究project ，除左自己有idea 外，仲要睇下professor 覺得有冇空間同價值去做，所以並非話想做就做咁簡單。對於工作時間，我亦問過其他senior students，佢睇話按照我現有嘅工作來講，其實差不多。不過，我就係覺得係咪應該做多D，還是其實唔需要急，以後再多D 經驗，睇下現有project 嘅發展，先決定點develop 其他project。 「唉，其實我發覺Grad School 好容易令人迷失。自己一直做，但並唔係每一個task 都有實質deadline，或者有人provide feedback，話俾你知你到底進度係唔係正常。最主要，其實每個人都可以做比現時更多嘅野。做與不做，就取決於每個人嘅目標。大家嘅目標都係想publish 多D paper，對於畢業以後搵工黎講，越多越好。就算係咁，其實都唔會有人同你講，點樣數量嘅publications 為之多，或者足夠，因為每個人對於畢業以後嘅目標都唔一樣。甚至乎，你有一個比較清晰嘅目標，問一D 有經驗嘅人自己依家做緊嘅野，會唔會達到自己個目標，個D 人都未必知道答案。」Michael 突然嘆氣話。 其實，佢所講嘅我明白，亦都身同感受。唔止Grad School，其他所有工種都會有類似嘅問題。我諗，我地一齊都咁懊惱，只不過係因為我地剛剛開始讀，所以唔適應一下子冇左以前讀大學個種，定時定候會有考試，有分數去provide feedback嘅生活模式。不過就算明白個道理，心裡面確實係俾li 種徬徨感煩擾。其實冇feedback，靠自己motivate 自己嘅讀書模式，就好似一個深淵，你愈去望，愈去思索究竟係咪正常咁發展緊，就只會感受到無窮無盡嘅伸延，唔會有清晰嘅盡頭或者答案。