我明明係殺手，搞乜鬼掉返轉保護個目標？: 1

「RPG呀！」隔離嘅隊友好大聲咁嗌，與此同時佢都向另一邊飛撲。 

我擰轉面見到對面大廈天台有條契弟係度放冷箭，火箭炮嘔晒白泡咁向住我飛埋嚟，睇情況唔顧得瀟灑嘅形象，唯有即刻向另一邊石堆撲去。 

「轟隆…」火箭炮係我身前十米炸開，反應慢少少都變肉醬。 

「我仆你個街！」我敏捷地拎起手中嘅M4A1步槍，向著天台毫不留情一番掃射。 

「你老細搵你，你老細搵你…」 





「喂你電話響呀。個鈴聲咁煩膠，改咗佢啦。」耳機入面傳嚟嘅係我戰友不滿嘅聲音。 

「唉屌，老細有強迫症逼我哋換呢個鈴聲，有乜計呀！唔打住啦，聽日再玩喇。」我退出咗啱啱先破解完嘅BF4，萬般不願意咁拎起檯上嘅唉瘋。 

「喂呢度係3顧客服務熱線，而家已經過咗辦公時間，請唔好再打過嚟。」我即刻換返把死狗聲。 

「死仔…係咪玩嘢呀？」電話嘅另一端傳嚟一把發哂姣嘅聲。 

「對唔住呀大佬，講笑咋。M，咁夜搵我咩事呀？」聽到佢把聲真係打哂冷震。 





「有單緊急任務呀，快啲換衫出去啦。」都唔知佢係咪拎住條青瓜練緊格劍術。 

「我好忙喎，你搵R啦。」八婆唔好阻住人打機好喎。 

「R而家係中東拆緊核彈呀，咪咁多柯哥啦。」 

「咁T呢？」而家凌晨三點，放過我啦。 

「T佢早兩日見有免費龜零膏派，去食咗兩盅，點知原來條友仔對鮮茯苓敏感，而家入咗廠啦。」 





「咁仲有四大皇牌ABCD呢？」 

「你都識講係皇牌啦，呢單咁少嘅嘢緊係交俾你呢啲小角色做架啦。」個八婆笑到好似高潮咁。 

我都唔知點答好 

「三萬蚊。去旺角唐樓隊冧個o靚仔，條屍掉落海，乾手淨腳。查過晒架啦，佢正宗毒撚一個，唔見咗都唔會有人知架啦，絕對無手尾跟。等陣send咪啲資料俾你，係咁先。」