《港女FF妄誌》: [Day 05－意料之外] PART 05
無Doris咁好氣～無Doris咁好氣～
我就拎住杯咖啡返埋位道開始工作～
呢期都係要搞D PPT多～
唔同科有唔同既PPT～
又要攞返上年既PPT出黎...根據今年既更新同方向作出修改～
其實呢D野係唔係應該由我地呢D Sales做架呢？
唔係我地呢D Sales做，又會係邊個做呢？
唉～
其實而家做Sales都真係一D都唔容易...
又要Sell客～又要Cold Call～仲要準備埋Workshop既野～
雖然話有好多技術性既野都會有技術性D既同事去講解～
但係我地呢D Sales都要有返咁上下既“基本”知識～幫其他部門去分擔下～
就算俾D客問起，都唔會唔識答～
咁邊個幫我地分擔Sales既工作？
真係唔知由幾時開始，分工變得咁混淆...
好似個個人都要識晒所有野...
唔止要周身刀...仲要張張利...
人工又唔係高...福利又唔係好...D錢又去晒腦細道...
我真心唔明點解仲要做...
唉～
講開又講...我都真係幾鍾意吐槽架喎～
尤其係工作期間～
應該話返親工我都總係要一邊念念有詞咁吐槽咁一邊工作～
不過係咁架啦～
喺香港做打工仔係咁架啦～
勞而不獲丫嘛～生不逢時丫嘛～生活艱難丫嘛～高山低谷丫嘛～
你快樂過生活～我拼命去生存～
幾多人位於山之巔俯瞰我的疲倦～
渴望被成全～努力做人誰怕氣喘～
但那終點～掛在那天邊～
一邊聽高山低谷一邊做～
好唔專心？
都真係幾唔專心架～
咁專心係做唔到野架～
係要搵D野去平衡下～麻醉下～唔係既話真係人都癲架～
唔單止要聽住歌做～仲要不時上下Yahoo睇下有乜八卦新聞～
好似話鄧走音終於都忍唔住万刀甲要上演失戀日～
吳若雞終於唔再係雞係公廁～
肥苟唔再肥～仲好好J～
又睇下古巨基同周慧敏呢對本來應該係最應該一齊卻無一齊既最佳情侶講下有幾好朋友～
係唔係真係愛得太遲？我都唔知～
或者係...越係夾就越係唔可以一齊～（型到盡頭便是柒D Friend～）
兩人越相似...越有共同話題...越係天生一對...越係命中注定...就越係無可能走埋一齊...
總係覺得...太夢幻...
就讓他/她留在夢幻裏...
總係要留返少少距離...
總係唔可以走埋一齊...
因為總係覺得...萬一真係走埋一齊既時候...並唔係好似夢幻之中咁夢幻...
夢幻破滅…返回現實...
到時...失去一個比情人更親密既朋友...真係比失戀更痛...
為左唔要承受呢份痛...所以都係將佢放喺情人更高既位置～
你話知己又好～閨蜜又好～咩都好～
總之就係就算相隔幾遠，幾耐無見無聯絡，關係仍然唔變～仍然係最親最蜜最重要～
個個也探問愛戀不老的秘方～唯獨壯烈離座可百世流芳～
一邊睇下八卦野～一邊諗下人生哲理～一邊聽下歌～一邊Hea住工作～好快又過左兩三個鐘～
而當我又去F5個Yahoo網頁之時，我見到有則置頂左既新聞...
『迷你倉大火...』我睇到個標題...口噏噏咁...噏左出口...
乜原來...有火災...
我都好似好耐無睇過...Yahoo新聞會報導火災...
事實上...同左阿Ken一齊之後...我都真係睇多左新聞...
我都會留意多左…有關火災既新聞...
不過唔知係唔係因為近呢幾年真係少左火災發生...都唔覺Yahoo新聞有火災報導...
之但係今次...
我撳入去內文睇一睇...
『上午十時五十九分...』大約一個鐘頭前...
係喺...香港九龍...牛頭角...
距離我而家身處既Office...都唔係好遠...
仲可以話係...有D近...
原來喺呢頭附近...發生火災...
火災現場係…一個迷你倉...
係工業大廈既迷你倉？
唔...
我繼續睇...繼續睇段新聞...
消防員接報到場...並派出煙帽隊及升降台開喉灌救...
喺呢頭附近...已經派出消防員去灌救...
開始灌救…消防員已經到場...
阿Ken今日要當值...
唔知阿Ken又有無參與...參與灌救工作呢？
唔知嚴唔嚴重呢...
唔知會唔會有危險呢...
救火喎...唔危險就假啦...
仲話要喺工業大廈...睇以前D新聞...工業大廈發生火警都非同小可...
總會有人命傷亡...
仲要係消防員…
總會有一兩個消防員遇上不測...
遇上不測...
彩彩彩彩彩彩彩彩彩彩彩！大吉利是！！！
飲完滴露再講過！！！
邊有咁多不測丫～
而家D消防設備咁先進～訓練又多左～意識又強左～一定無事既～
好小事姐～好小事姐～
應該好快就救熄既～
唔好自己嚇自己...唔好自己嚇自己...
我閂一閂段新聞…又開始做下野…
但對住個紅色底色既PPT...我成個腦都係火...
火火火火火...好多紅色既火堆...
真係好難專心喺工作裏面...
我又忍唔住要打一打開個Yahoo...又睇下有無乜野有關迷你倉火災既最新消息...
而喺明報、星島日報、生果日報、香港電台都係話火警持續...火勢並未受控...更有蔓延跡象...消防員正不斷努力灌救...
火勢並未受控...更有蔓延跡象...
咁係唔係即係話...情況惡化緊丫？
情況惡化緊...
控制唔到火勢...
有蔓延跡象...
咁係唔係即係越黎越危險？
越黎越危險...
對灌救緊既消防員黎講...係越黎越危險...
越黎越危險...阿Ken會越黎越危險...
越黎越危險...越黎越危險...
唔會既唔會既～點會呢點會呢～
真係危險既話，上頭都唔會俾佢地入火場啦～
你估仲好似當年嘉利大廈既咩～
唔會唔會～一定唔會～
唔會好似廿幾年前咁～一定唔會～一定唔會～
唔好自己嚇自己啦～
唔好俾D失實又誇張既報導嚇親啦～
嘩眾取寵咋嘛～我懂的～
都係唔好睇咁多…都係唔好睇咁多…
唔睇就無野架喇...唔理就無事架喇...
唔睇唔理...我個心又點可以話真係可以平靜落黎...
我個心都仲係好亂...仲係好擔心...
好擔心阿Ken...好擔心阿Ken既安危...
冷靜D...冷靜D...
唔可以亂諗野...唔可以亂諗野...
萬一假如如果真係大吉利是講句有乜西瓜豆腐...嗰邊都會打電話俾我架嘛…
係囉...係囉...無電話到就無事啦...
就喺呢個時候...
“典 經 法 為邪定界 色 空 相 怎樣理解 解 亂置好與壞”電話響！
我成個人嚇左一嚇！個心真係好似跳左出黎咁！
亂...亂置好與壞...
“生 死 似 斷橋敗瓦”
生...死...似...斷橋敗瓦...唔係真係咁…咁...
“真 假 似 水月鏡花 花”
我手震震咁...喺檯面上...喺檯面上...拎起...拎起部...拎起部...電話...
“盡吐恩與義 乍愛變恨”
唔好丫...唔好真係丫...唔好真係...唔好真係...
我望一望個Mon...
『Doris？！』個Mon正正就係顯示住Doris個淫樣！
我頂你個...
『我頂你個肺呀？！』我一接聽電話就忍唔住破口大罵！『做乜打電話黎呀？！』
無啦啦打電話黎，想嚇死人咩？！
「我岩岩去左洗手間諗住唔返入黎咪打電話問你食得飯未囉～唔使頂人個胸丫嘛？」Doris嗲聲嗲氣咁既樣...
『食…食飯...』原來不知不覺已經到左放飯時間...
「係丫～行得未丫你？」Doris追問一下...
『哦...哦...行得行得...』食飯...食飯...
「咁我喺𨋢口等你啦～」
『嗯嗯...𨋢口等...』
食飯…食飯...都係食左飯先...
我執一執好D野...拎埋個銀包仔...望一望部電腦個Mon...望住個Yahoo新聞...
迷你倉大火...迷你倉大火...
都係唔好睇！
我閂一閂埋個網頁就行出公司門口！
一行出公司門口，Doris就打量一下我：「無見一陣間姐，做乜面青青咁既？」
『下…係咩係咩？無...無丫...』我摸下摸下自己塊面...其實係摸唔到自己塊面有無青到...
「唔係喎…你嘴唇都白白地咁喎...你真係無事丫嘛？」Doris再認真D咁打量一下我...
『無…無...無事…無事...真係無事...』我係怕阿Ken有事姐...
「嗯...」Doris見我話無事，就唔再追問落去...（不過佢個樣就好似有D猶豫...）
講真嗰句...又點會唔擔心到面青口唇白...
自己既男朋友做消防既，平時都總係會擔心...
只可以用“邊有咁多大件事”做藉口安慰自己...
但當真係有大事發生之時...乜藉口都係呃唔到自己...
只可以求神拜佛...阿Ken平平安安...無穿無爛...
帶住提心吊膽咁既心情...同Doris黎到茶記...
「丫～我頭先去洗手間都唔記得拎埋個銀包添～詩琳～幫我出住先～」Doris成條小蟹柳咁笑笑口...
『哦...哦...』我已經無心情去理Doris係唔係有心走去洗手間扮晒唔記得拎銀包...實質係要我出錢...
我只係好專心咁睇住茶記裏面部電視...
可能係茶記裏面太嘈...又或者部電視機無開到聲...我聽唔到電視機發出既聲音...
我只係見到畫面係播緊無記新聞...
播緊火災現場...
迷你倉火災現場...
喺畫面裏面可以見到...好多煙...好多濃煙...成個畫面都係濃煙...
好似好…好嚴重...
呢場火...好似真係好...好嚴重...
「喂～叫野食先咯～好肚餓喇～唔該～」Doris淫叫一聲...
「黎黎黎～兩位靚女想要D乜？」個肥佬侍應就望住部電視咁行過黎我地呢邊...
「一個B餐凍奶茶～」Doris好快咁叫左野食...
「一個B餐凍奶茶...跟住？」個肥佬侍應一路望住部電視一路落單...
『一樣...』我都無意識去諗食乜...
我只係好留心咁睇住部電視...同在座所有食客都一樣...一樣好留心咁睇住部電視...
我好留心咁睇住畫面裏面D細字...
但可能坐得太遠...又可能我有D近視...又可能部電視唔係高清...又可能D字太細隻...
就算我幾咁留心矇起對眼黎對焦...都總係唔可以好清楚咁睇晒裏面D字...
我就只可以睇到...睇到...三…三…三級...
係三級火嘛？
呢場火...已經係三級火？
我聽過阿Ken講：「一般黎講...如果場火升到去三級...都真係同三級片一樣咁嚴重...」
嗰陣時佢D語氣仲幾凝重...但我就覺得佢似嚇我多D...
之不過到左而家...到左真係發生...我又真係...好擔心...
我好擔心嗰陣時阿Ken唔係講笑...而係講少左...
實際上...三級火比起三級片...更嚴重...
我真係好擔心...
好似從來都未試過咁擔心...
事實上...往往都係發生左先識得擔心...
我地好似一直都唔識得居安思危...
我地好似一直都只係知咩叫唔見棺材唔流眼淚…
總係好似...最可怕是...愛得太遲...
「兩杯凍奶茶...」個肥佬侍應一路望住部電視一路放低兩杯野飲...
「咦？乜原來有大火丫？」Doris亦都望一望部電視，好似發現新大陸咁...
『唔...』我都仲係好留心咁睇住部電視...
「嘩！好似好嚴重咁喎！」Doris又好似好驚訝咁...
『唔唔...』我都睇得見...
好大煙...好大濃煙...有好多濃煙不停咁喺座工業大廈冒出...
差唔多已經見唔到座大廈...只係見到一大片灰黑色既濃煙...
成座工業大廈都俾灰黑色既濃煙包圍住...
「你男朋友係消防員黎架喎...」Doris勾一勾起...
『唔...』我所擔心既...
「知唔知佢使唔使參與救援丫？」Doris問一問...
『唔...唔知呢...不過我諗都應該要...』我望住電視裏面影住一個消防員企喺條雲梯上面...不停向住濃煙射水...
總係有幻覺覺得呢個企喺條雲梯上向住濃煙射水既消防員就係阿Ken...
因為...呢個企喺條雲梯上向住濃煙射水既消防員就係阿Ken既話...都叫安全D...
起碼唔使入火場...
淨係睇住個畫面見到有咁多灰灰黑黑既濃煙都覺得夠晒震撼...
真係唔敢想像喺火場裏面個情況係有幾咁惡劣...
「唔使擔心喎～而家D消防設備咁先進～一定無事既～放心放心～」Doris終於都察覺到我擔心緊D乜...
『嗯嗯...』不過我又點可以真係放心得落...
「兩個...B餐...」個肥佬侍應一路望住部電視一路放低兩碟野...
我就一路望住部電視...一路用隻叉筆D飯入口...
一路筆...一路筆...無知覺咁筆...完全唔知自己係食緊黑椒蒜蓉定白汁...
「嘩！真係好誇張呀！」幾個麻甩佬行左入黎...
我仍然望住部電視食飯...
「嗰邊封晒路喇！」
我聽到有個麻甩佬勁大聲咁講...
嗰邊...封晒路...
係講緊...火場嗰邊？
「我地走出黎既時候都封緊啦！」
我又聽到另一個麻甩佬講一講...
「係丫！唔係要疏散，老細都唔會肯俾我地走啦！」
疏散...
「不過真係好誇張！D煙大到...唔好話隔幾條街都聞到...直頭成條街都煙霧彌天咁！」
成條街都煙霧彌天...
睇黎真係...真係講緊火場嗰邊...
「所以咪唔單止我地，就連幾條街既舖頭都疏散晒！無野食！要過到黎呢邊囉！」
呢班麻甩佬...係喺嗰邊過黎...
「唔好話丫！我身上都好似有D燶燶地既味丫！」
講一講...我都好似聞到...
聞到D燶燶地既味...
望住部電視裏面既濃煙...聞到D燶燶既味...就好似置身喺現場一樣...
「我睇佢丫...仲有排燒...」另外一個搭檯既食客又望住部電視搭一搭嘴…
仲有排燒...
「梗係啦！迷你倉喎！迷你倉多咩丫？雜物囉！仲要堆到滿滿咁！塞到實一實咁！乜位都無！燒起上黎好似連環船咁連環燒！仲點救呀？！」
燒起上黎好似連環船咁連環燒...
「咪就係囉！你睇下而家咁大煙就知裏面燒到冚冚聲啦！」
裏面燒到冚冚聲...
「而家仲話要搵幾隊煙帽隊入去喎...痴線架咩？！由佢燒飽佢好過啦！」
幾隊煙帽隊入去...
真係派左人入去火場…
會唔會真係...會唔會真係有阿Ken份架？！
「咁又唔得喎！消防員就係要救火救人架嘛！佢地唔入去，邊個入去丫？！」
救火救人...都要喺安全情況下先去救架嘛！！！
「入面都無晒人啦～得返D財物咋嘛～咪由佢燒晒先入去救火囉～」
入面都無晒人...咁就唔使派人入去啦...
阿Ken就唔使去冒險啦...
「財物重要過人命架！對迷你倉既老闆黎講～對物主黎講～」
財物比人命重要？！
黎個咩世界黎架？！
條命唔係你就梗係講得輕鬆！
試下入火場嗰個係你！睇下你仲會唔會咁口響？！
「唉～無辦法啦～D前線既都係聽Order做架姐～」
聽Order做...
好多時都會聽到阿Ken好無奈咁講：「無辦法啦...都係聽Order做架咋...」
嗰陣時我就無乜點留心聽...
無乜點聽阿Ken係因乜野事要聽Order做D乜野...
我都只係當佢想搵個人聽下佢發下噏瘋...
之但係而家...我先想可以認認真真咁聽一次阿Ken講...講下佢工作既辛酸...
原來阿Ken平時當值要面對既...係咁無奈...咁危險...
「你唔好話我話丫～一定出事！」
一定出事？
「唉～我都覺得係～唔係話我地口臭黑心～呢D情況，唔出事上面係唔會知驚！」
唔出事上面唔會知驚？！
到出左事...上面知驚都太遲啦！
「嘩！」突然成間茶記既食客都嘩左一大聲！
我望住部電視...有一團深黑色既濃煙由大廈既窗戶噴出！
然後無幾耐又有一大舊火球由大廈既窗戶噴出！
「嘩！」成間茶記既食客又嘩左一大聲！
好大火…好大火...
「係閃燃！一定係閃燃！」其中一個麻甩佬大大聲聲咁講...
閃燃...CCTVB？！
「呢次大件事喇...呢次大件事喇...火場裏面班消防員真係大件事喇...」另外一個麻甩佬又念念施念慈咁...
火場裏面班消防員…火場裏面班消防員…
阿Ken...阿Ken！