失控性.行為: 第二節

「你好，我係呢度既物業經理，我姓黃架！」那個姓黃的物業經理說話的語氣和聲線差不多與曾志偉一模一樣，如果他不是姓黃，我會懷疑他是曾志偉的弟弟。
 
「你就係呢度既經理啦？我就住三座廿六樓既，你講！點解部升降機整咁耐都仲未得！有時候又唔停我地既樓層，你地點撚樣管理架！」那男人說。
 
黃經理露出了曾志偉的招牌式笑容說：「唔好勞氣！我完全明白呢位先生你既感受架！如果我係你，我一早就叫晒報紙佬過黎唱衰我地管理公司架啦，不過好在呢位先生你都明白事理，所以我諗我既解釋你一定會聽既。」
 
那男人聽了黃經理的說話之後，有點飄飄然的說：「梗係啦，我地斯文人就最講道理架啦，你講！你解釋俾我聽。」
 
「我講左升降機點解成日唔停你地既樓層先啦，最重要就係呢度咁尊貴既物業一早就已經採用左一種先進既派送系統，升降機會感應到裡面既重量，如果裡面既人數滿晒，升降機就會自動落去地面，咁就可以慳返唔少時間啦，唔通仲好似公屋咁層層停咩，係咪？」黃經理說。
 


「咁…..咁點解部升降機咁耐都仲未整好呀！而家得一部升降機用得，我而家返工差唔多日日遲到，的士錢係咪你地俾返呀？」
 
「其實部升降機整咁耐我地都有苦衷，你知唔知我地做物業管理既最重要係咩？就係安全！好坦白講，你地咁尊貴既身份有咩事就唔好啦，係咪？承辦商其實一早有零件可以換，佢地原先就俾大陸貨我地，但係我話唔得！一定要德國貨！咁我地咪即刻訂貨再由歐洲空運過黎囉！你知啦，空運又要時間，所以到今日都仲未整好囉。」黃經理一臉認真的說。
 
「哦，原來係咁，你都講得啱，安全真係好重要既……..」那個男人說。
 
「所以我話你咁明白事理，一定了解我地既難處。」
 
「咁…….咁你地跟緊啲啦，成日得一部升降機用真係好麻煩架。」
 


「放心！我一定會跟得好緊，到時有咩新消息一定會通知先生你！」
 
那個男人聽了之後，便轉身離開。
 
這就是物業管理吧，父親曾經說過「前世作過孽，今世做物業」，我想每一日要面對不同住客的投訴，日日要被住客問候家人，這種委曲求全的工作為何還有人願意做，可是當我看到黃經理處理投訴技巧之後，我就知道，其實物業管理不是一個太難學習的行業，只要有高超的交際技巧，一切事也能化險為夷。
 
這刻，眼前的這個黃經理是我第一個要學習的對象。
 
36E嗲聲嗲氣的向著黃經理說：「黃生～你真係好勁呀，咁麻煩既客都俾你攪得掂～」
 


「濕濕碎啦，再麻煩既都遇過。」黃經理面對著我說：「呢位係…….」
 
我立刻站起身說：「你好，黃生，我今日第一日返工，我叫做張卓文，你叫我阿文得架啦。」
 
「哦！新黎既，寫未樓通知左我架啦，你入黎坐低，之後搵人帶你行一行個屋苑啦，我地呢排要開西，所以忙啲。」
 
「開西？」我一臉疑惑的說。
 
「西即係英文既site呀，哈哈，開site即係公司啱啱接左個新既屋苑返黎做，所以要幫手預備文件同買野，哈哈。」
 
「嘻嘻！」36E聽了之後也忍不住笑了一聲，我在想她是在嘲笑我的淫念吧。
 
黃經理指示著我往辨公室的方向行去。