《聽說她是一隻Hell雞……》: 第二十節

聽完呢個電話我連床都冇賴即刻彈咗起身，九秒九咁將啲被摺到起晒角，仲將凌亂嘅書枱全部執好晒，再去廁所洗個面，著返條褲同件衫，啱啱好四分五十八秒，然後佢就敲門。
 
我叫咗句：「入嚟啦。」
 
佢應聲開門入咗嚟，今日嘅佢好精神，化咗個淡妝，上身一件橙紅色Tee，下身一條卡其色短褲加一對米色高筒Cons，雙手擺咗喺後面，好似收埋咗啲嘢咁。
 
「嘩！Jack間房你好整齊呀！我間房勁亂……」佢行過我張床嚟到書枱，然後俾咗隻毛茸茸嘅熊公仔我，笑住咁話：「嗱，呢隻熊公仔係送俾你嘅，你上次話我個頭好似隻大棕熊，咁你以後見到呢隻熊都要諗起我，哈哈……」
 
我接過隻公仔，一時之間呆咗，只係講咗句：「多謝晒呀Candy。」但我知無論我用幾咁華麗嘅詞藻去堆砌，都形容唔到我呢一刻嘅心情。
 


Candy喺我未回過神果陣，就拎走咗隻熊公仔，然後擺咗去我張床嘅角落，再轉頭同我講：「快啲去整嘢呀！」
 
「哦……咁你自己做住功課先，我去沖涼整嘢先。」講完之後我就拎齊毛巾、洗頭水、沐浴露同埋替換衣物，準備去沖涼。
 
佢應咗我一句就開咗我部電腦，我亦去咗浴室。沖沖吓發覺有啲唔對路……咦？我部電腦有Set密碼㗎喎！佢點做功課？
 
於是我就開行Turbo加快速度，嗱嗱聲沖完涼返房諗住幫佢入密碼，點知一打開門就見到佢已經坐定定喺度，開咗份Word做緊功課。
 
「你……你又知我密碼嘅？」我吃咗一驚。
 


「你生日吖嘛，傻佬！」佢理所當然咁講。
 
「你又知我生日？」
 
「你Facebook咪有囉！」
 
「你……你真係好醒。」我忍唔住讚咗佢一句。
 
「多謝，嘻。」佢笑咗笑又繼續專注做功課。
 


Candy……