《聽說她是一隻Hell雞……》: 第十八節

食完飯之後，我同Kevin都冇晒堂，佢就執嘢返屋企；而我，就返咗房上高登。臨走之前Kevin拍一拍我房門，我大叫：「入嚟啦。」
 
佢行咗埋嚟我身邊，交咗樣嘢喺我手，跟住講咗句：「小心啲呀。」然後頭也不回咁走咗，不帶走一片雲彩。
 
我拎起一睇，屌，0.03？
 
雖然呢樣嘢到咗我手都係毫無用武之地，但點都算係Kevin嘅一番心意，所以我擺咗喺銀包以備不時之需。
 
之後嘅日子，一切都風平浪靜，不過奇怪嘅係Candy冇再搵過我食宵，正當我以為係時候收皮嘅時候，喺十月嘅第一個星期五，十月五日，一堂我同佢嘅Lecture，佢又俾咗個希望我。
 




果日佢照舊坐咗喺我隔離，只不過我哋之間嘅氣氛已經冇之前咁融洽，話題亦少咗好多，大家都只係顧住聽Professor講解Powerpoint。雖然唔知佢有冇專心聽書，但至少我冇。
 
正當我悶到就嚟瞓著嘅時候，佢突然間問我：「Jack，你想唔想去海洋公園個Halloween呀？」
 
我個腦猛烈咁震咗一震，我疑惑咁望住佢，反問：「做咩咁問？」
 
「冇呀，我有個Friend多咗兩張Halloween嘅飛，想問吓你有冇興趣一齊去咋嘛。」
 
腦海入面嘅餘震仲未息止，我強作鎮定咁問：「幾……幾時先？」
 




「今個禮拜日七號，你得唔得閒？」

「應……應該得嘅……」唔知點解我偏偏喺呢啲時候口疾疾。
 
「真嘅？好嘢！咁約實你㗎嘞喎！」Candy好雀躍咁講。果一刻佢嘅表情就好似一個細路女有糖食咁興奮。
 
於是，落堂之後我即刻去咗海洋公園個網度做足Research……