《聽說她是一隻Hell雞……》: 第十三節

之後我哋嘅話題，都係圍繞住Kevin當年扑濕晒佢全Form啲女嘅性戰史、咩欲擒故縱、乜春Cat Rope Theory等等……不過我都係左耳入右耳出，因為我知道自己呢種毒撚並唔係做Playboy嘅材料，我剩係想簡簡單單拍吓拖就算，所以真係浪費咗Kevin一番心機。
 
不過，依家嘅我起碼有一個明確嘅目標，就係要將Candy嘅Facebook拎返嚟先，觀察吓佢有幾多相、有冇In a relationship、性取向等等……
 
於是我喺第二日晏晝十二點幾就Send咗個Whatsapp俾Candy：「Hello，Candy你有冇Facebook？」
 
過咗陣我食完個Lunch，佢終於覆咗我：「有呀，你俾你Facebook我，我Add你吖。」
 
「Jack Dawson，Icon係我個樣。」
 


過咗幾分鐘，佢Whatsapp返我：「Add咗啦，做乜無啦啦想加我Facebook嘅？」
 
「你想我答你乜嘢？」我問完之後，佢就冇再覆返我。
 
我哋大家就算冇講明，但我同佢之間始終有條界線，但願呢條界線係阿Sa個淺溝，而唔係高海寧個洪溝。
 
我食完個Lunch之後，即刻嗱嗱臨返Hall開Facebook接受咗佢個交友請求，佢Icon係一張自拍，個樣笑得好甜，一頭令人眼前一亮、天然微捲嘅中長黑髮、瀏海啱啱好遮住咗堂眉、一抹淡黑色嘅眼影。如果一定要揀嘅話，我會比較鍾意Icon入面嘅佢。
 
不過講起佢個妝，其實我奇怪咗好耐，由上堂落堂、去到食Lunch食宵，佢都係化咗一層好淡好淡嘅妝，到底係咪要準備隨時接客？定係佢根本就當咗我係佢其中一個客呢？可能，只係佢太注意儀態外表，係我諗多咗。