《聽說她是一隻Hell雞……》: 第七節

果一晚之後，我就好似一個叫雞時撞正掃黃跟住黑布蒙頭上警車嘅過街老鼠咁，唔知點樣面對佢，但另一方面又好期待星期五嘅Lecture，因為可以坐喺佢隔離，傾吓計、講吓笑又一堂。未識到佢之前，我冇諗過兩個鐘時間原來係可以過得咁快。
 
上幾次喺Hall度撞到佢，都因為唔同嘅原因而急急腳咁走咗，冇留意到佢係住喺邊層，所以我暗暗幫自己訂下目標，下次撞到佢嘅時候一定要知佢住喺邊一層！
 
每一日嘅時間都過得好慢，本身Hea讀嘅我亦好似行屍走肉咁，有Quiz就溫吓Powerpoint、有Assignment就Deadline前一日趕工完成，但唔知點解人愈大時間就過得愈快，回想起之前所渡過嘅十八年青蔥歲月，真係眨吓眼就溜走。
 
終於終於，俾我等到星期五，果日我好早起咗身，沖定個靚涼仲Gel埋頭，成副武裝咁去上堂，俾佢見到我咁型我真係驚佢按捺不住打個六五折俾我。
 
呢次我為咗顯示自己已經適應咗大學嘅上堂模式，所以我特登遲五分鐘入演講廳，果然不出所料，佢坐咗喺上次個位，輕輕的我來了，坐咗喺佢隔離，佢一見到我，就問：「Jack，做乜今日咁型嘅？」
 




我輕浮地講咗句：「唔好意思，我日日都咁型㗎喎。」今日嘅我，係一個有自信嘅毒男，將之前唱淫歌嘅事當作冇發生過。
 
佢聽完之後又掩住嘴咁笑咗。大佬，笑啫，洗唔洗咁有儀態先？
 
突然間佢問咗句：「係喎，你幾時唱歌俾我聽呀？嘻嘻……」
 
俾佢突然揭我瘡疤，我真係唔知點算好，就輕輕力搣咗佢面豬燈一吓，話：「唔准笑，再笑冇Friend做。」然後做咗個好認真嘅表情。我感覺到身後有幾道冷冷嘅目光射向我哋，我將呢啲目光解讀為「葡萄的目光」。
 
佢見我好似真係嬲咁樣，就話：「Sorry呀阿Jack，唔好嬲啦，講吓笑咋嘛。」跟手捉住我隻手搖咗我幾吓。
 




見到佢楚楚可憐咁樣，唔好話真嬲，連假嬲都嬲唔落……
 
「咪搞住，聽書先啦。」我講完之後就鬆脫咗佢隻手。
 
貴為一條毒撚，同啲囡囡有身體接觸嘅時候真係有啲不知所措，所以唯有轉移視線，但其實明眼人一睇就睇得出，我係有幾咁興奮。