[有聲故] [少甜] 我同時做左三間大學嘅學生: 差館

---
 
我迷糊中醒了過來，驚覺自己正躺在靠牆的石椅上。我嘗試坐起來，呀…頭好痛…身軀極度疼痛…
 
「喂你醒番嗱？你見點呀？」身邊的兩個人走過來扶住我。我定神看看四周，有數個青年靠牆而坐，有一個身穿寶藍色衛衣的青年兩手抓著黑色鐵欄，向外面大罵，似乎我們身處一間大拘留室。
 
「好凍…」我道。
 
「頂住呀兄弟…你都幾傷下…」我摸摸臉龐，只見掌心黏著已乾涸了的血塊。
 


「咪撚再搞事呀你地！」一個警察在鐵欄外大喝，以警棍狂敲鐵欄鐵柱。
 
「你地都係旺角俾人拉？」待那瘋警走開了，我問那幾個青年。
 
「係啦。」「喺朗豪。」「喺銀行中心。」
 
「我…係喺彌敦道。」我無力地說。完了，俾拘捕了，什麼都完了。
 
「記住班狗問咩都唔好答呀。」其中一人提醒我。「點氹、點嚇、問幾多次都唔好理佢地呀。仲有，佢地會俾好多嘢你簽，除左檢控書，咩都唔好簽呀。」
 


「唔…」好像較早前模糊之間被迫簽了好些文件。
 
突然，鐵閘打開了。兩名軍裝警察帶走了我和兩個少年，我被掉進一個像問話室的房間坐下，想必另外兩人也是。有兩名穿便服的警察走進來，似是準備替我錄口供。
 
「死『口靚』仔！你做過咩心照啦！唔好晒我地時間，如果唔係下一拳就打落你個頭。」其中一人揮拳重擊我面前鐵桌。
 
「冷靜Ｄ。」另一警微笑，拍了拍燥警。「嗱，先生，我地都係打份工。如果你合作Ｄ，認罪，我可以俾你快Ｄ走。」
 
雖然我被打到頭顱，但我腦袋可沒被打壞。一看就知這是軟硬兼施迫供法，我一隻字都不說是了，舉起我那隻被屈得瘀青的中指。
 


「你！！」燥警要再發瘋之際。「咯，咯咯」有人敲門。
 
「Sir。」軟硬天師都站了起來，敬禮。
 
「等我處理，你地出番去先。」那衣著光鮮的灰髮西裝男說。
 
這又是什麼把戲，眼前此男子好像位高權重…有點高得像不應該出現在這個殘舊的問話室內。
 
「您好，陳先生。」他坐在我對面。想必先看了我檔案，知道我的名字，不意外。
 
「D手足冇對你亂黎？」他輕鬆笑問。
 
「你話呢。」我還是沉不住氣，指著自己的破頭怒說。
 
「Well…前線情況混亂，意外在所難免。」他托了托眼鏡，沒當一回事的回答。「如果冇乜問題嘅話，陳生隨時走得架啦。」


 
「？」
 
「呀東，咁多年冇見，唔記得uncle嗱？」眼前的男子慈祥地說。
 
「？？」
 
「又難怪…嗰陣你仲係手抱BB咁大。」他緩緩站起來。「我同陳局長係舊朋友，好多好多年前嘅朋友聚會我見過你。」
 
「點解你知我喺呢度？」我不解。
 
「警察做嘢就係咁。一查查三代，佢地一見到你父親係邊位，即刻Highlight左你個名，唔敢亂黎。」他把領帶輕輕移正。「D細嘅唔敢揹獲、唔知點做，就交俾上級。結果你個file越飛越高，飛下飛下就俾左我助手，佢上報俾我知，就係咁簡單。」
 
「咁就要幫我？」我胡塗了。雖說犯法不等同犯罪，我確是犯了法；這樣白白放我走，還有皇法可言？
 


「雖然當年我婉拒左做你契爺，但係以我同陳局長交情，今日我非幫你不可。我想為你好，唔希望你人生有污點。」他嘆氣。「呢單嘢已，內部已經定性左係暴動，好大件事。如果我唔及時出面，我估你應該好似隔離房個後生仔咁，俾人除晒衫開恆冷氣，打住咁問話。」
 
「好快警方就要update傳媒被捕人數，原本就應該報55人。依家…因為溝通錯誤更正為54。你走啦，快D番屋企。」他按著電話，似是叫下屬更正人數。
 
「…如果我堅持要被捕呢。」我也不知自己那條神經壞掉，只覺得若這麼讓我一走了之，法治便真的盪然無存。
 
「唔…伙記會當你傻，唔理你。冇任何證據顯示你喺現場犯罪，所以立即釋放。我話嘅。」他有點不耐煩。
 
「咁…好啦。」折騰了整晚，我再無力爭辯。
 
「Very good! 會有人幫你包紮，再專車送你番屋企。多D休息。」他說罷便離開了。