我發現左我呀哥成日對住部電話講一種我聽唔明既語言: 21.細佬！係咪你？

我心入再泛起無盡既恐懼。
細佬，你究竟想點？係咪點都唔肯放過我？呀Q係咪你殺架？有咩就衝住我黎，點解要傷害其他人？我點會諗到今日，我地兩個既形勢逆轉，我在明，佢在暗。果然，斬草不除根，後患無窮。
我拎起小七手上拎住既頸鏈，狠狠咁掟左落地。心入面諗，我一定要將你手摷出來！你我之間，終要有個了斷。
而小七仲係不明所以咁想執返起條鏈，講：「Nir！做咩呀？條鏈抺下就乾淨架啦！唔緊要架！」
我捉住小七隻手講：「唔好執！條鏈已經對我冇用。」
「點解呀？」小七皺眉問道。
我冷笑一聲，講：「我而家先知道，自己一直太傻，竟然一直留戀一個想置我於死地既人。」
講完之後，我頭也不回咁走左。
當確認左細佬未死之後，我頓時覺得小七同呀風既嫌疑又高左，因為佢地睇落既年紀同體格都同細佬相若。
小七，如果真係你，我應該點做？




小七望住我遠走既背影，執返比我丟左係地既頸鏈，放左落袋。

我唔可以再坐以待斃，我回想起係香港既個段日子。究竟細佬，有咩特別之處比我可以辨認到佢？我真係諗唔到，而當時既我又點會諗到，今日，我地既狀況同當年有異曲同共之處，佢好可能就係我身邊，但我就認唔到佢。
於是，我用左一個好蠢既方法，成功我可以搵佢出黎，但失敗我就會暴露。

當我同小七單獨咁係文件室做野既時候。
「細佬！係咪你？」我凝重咁望住佢講。
小七驚訝咁抬頭望住我。我個心震左一下。但佢跟住好驚咁望望周圍，講：「Nir！你叫緊邊個？」似乎，佢以為我見到個啲野。我鬆一口氣，對佢笑左笑，搖搖頭：「冇！冇野！」
小七之後又好疑惑咁問我：「Nir！你想認我做細佬？」
我微笑講：「你願意嗎？」




「家姐！」佢怕羞咁叫左聲，亦表示左佢應承左。

「細佬！係咪你？」
「Nir！你叫緊邊個？呢到得我同你。」呀風聽到之後冷漠咁應我。
我皺眉咁低頭講：「冇！冇野！」
小七同呀風都表現得好自然，判斷唔到，究竟邊個先係。我下意識摸下心口條鏈，撲個空，先醒起自己已經將條頸鏈丟左。
「條鏈呢？」呀風問。
「丟左。」
「之前見你鏈不離身，仲以為條鏈對你有咩特別意義。」
「曾經係。」




呀風冇再問落去，我都一直觀察佢既表情，有冇咩異樣，佢，一如以往冷漠。
試探失敗，我顯得有啲焦躁，因為如果細佬真係小七，呀風兩個其中一個。佢就已經知道我開始懷疑佢，佢好快就會有進一步既行動，因此我依家既處境非常危險。

而我冇諗到佢既進一步行動會咁快，咁難以承受。當日夜晚，我返宿舍休息既時候，見到大批成員聚集左係小七間房門口，我行過去睇，見到小七低頭坐左係張凳到，而Lock同另外兩個成員搜緊小七間房，呀風同Jack都係到。
「Lock！發生咩事？」
「Nir！我發現最近被斬頭殺害既成員都係香港潛藏失敗返黎既成員，咁七同風就最大嫌疑，我岩岩已經搜左風間房，冇咩可疑，依家搜七間房。」
小七同呀風都表現得好淡然，似乎都唔係兇手。直至一部手機由小七間房搜左出黎，入面有佢同醫生傳訊息既記錄，令小七百口莫辯。
「七，你點解釋？」Lock質問小七。
「我⋯我唔知，呢個唔⋯係我既！」佢低頭無助咁講。
我推開Lock，愕然咁望住小七問：「究竟係咪你？」
「家姐！唔係我！真係唔係我，你要信我。」佢激動咁捉住我隻手講。
「我信你！」就憑佢呢句，我信佢，我想信佢。行事慎密既兇手，根本冇可能犯呢d錯，除非呢個係一個局，我望向呀風，佢依然淡然。
「Lock，件事仲需要調查一下，有好多疑點，我地唔可以就咁斷定佢就係兇手。」我開始為小七辯護。
Lock推開我，對住小七講：「Nir！我知道你同佢私交唔錯，但希望你可以理性d，證據已經擺係眼前，佢已經殺左3個人！我地唔可以放過佢。」
「Lock，求下你，比d時間我證明。」我開始顯我好焦急。




Lock冇理到我，問小七：「你有咩解釋？」
小七緩緩抬頭，堅定咁望住Lock講：「我冇做過！」我見到就連Lock都比小七既堅定影響，表情猶豫左一下。

「呯！」
但一切都太遲。我阻止到Lock既質疑，阻止唔到子彈直穿小七既心口。小七中槍吐血，絕望咁望向我。我望向指彈既來源，係Jack。
「呯！呯！」小七心口中多左兩槍。我迅速咁擋左係小七前面。之後呀風迅速咁擋左係我前面，推開左Jack 支槍，令槍頭指向另一個方向。
Jack放低槍，冷笑左一聲，講：「呢個係叛徒應有既下場。」
我跪左係小七旁邊，抱住佢，叫人：「叫醫生黎！」但冇人動身。
冇錯，連續既命案已經嚇怕左佢地，寧可殺錯，都不可放過一個。但我望住小七，都好清楚佢已經傷得好重，救唔返。小七佢望住我對眼，艱難咁將個條鏈放左係我手上，條鏈沾滿佢既血。佢再捉緊我衣領，令我更靠緊佢，一面吐血，一面係我耳邊講：「唔⋯好⋯信⋯」。佢句野都未講完，就斷左氣。
「小—七—」我崩潰咁大叫。
「小七，唔好瞓，醒下！為你自己辯護，你做到啦！我可以陪你返去報仇啦！醒下！醒下！—呀！」我一面喊，一面攬住小七摸佢個頭同佢講。
「小七，對唔住！對唔住！你會唔會怪我！我信你呀！我信你呀！唔好走，求下你！」
我喊到呼吸急速，我怒望去Jack到：「Jack！我要殺左你。」之後衝去Jack 到。但幾個人走過黎禁低左我。
「拖佢去後山。」Lock示意。
「唔可以！唔可以！你地唔可以咁對佢！」我癲左咁哭喊，但只能任由佢地將小七條屍越拖越遠。





然後Lock捉左我去呀Q之前住既個間療養室，將我鎖左係入面，再係門口同我講：「Nir！你變左啦！呀Q係佢殺架！就死係到，你咁樣對唔對得住呀Q?你係到好好反省下啦！」之後Lock就走左。
我一個人坐左係張床到，望住間房，一切又好似返返我岩岩做手術既時候。當時既我真係係到期待重生。
今日，我摸住痛到好似要裂開咁既心口，望住沾滿血既頸鏈，心入面諗「細佬，你見到你呀哥同家姐條屍，個心，係咪都係咁，痛？」我亦記得佢曾經同我講過：「我會令你後悔，後悔曾經咁樣對我家姐，一定。」

如果，一個月前你問我有冇後悔，我既答案會同以前一樣。但，今日，呀Q死左，小七死左，兩個都係因為我既優柔寡斷而死。小七既細佬係含冤入獄病死，今日小七亦都係含冤而死，都係我累既。我好後悔，我真係後悔個日放左你走。
我心痛咁摸住呀Q曾經瞓過既枕頭，心入面諗：「係我害死你地！係我害死你地！」
而枕頭套下面好似透左一個字出後，我除低個枕頭套，見到入面係一個用血寫既「風」字。

待續～


有興趣可讚黑柴Facebook
同步更新
https://www.facebook.com/%E9%BB%91%E6%9F%B4-879053098899020/