我發現左我呀哥成日對住部電話講一種我聽唔明既語言: 20.社交係消耗能量，但你係我屋企人
我將呀Q同佢原本既面皮葬埋一齊係後山，對於兇手係邊個，我心中有數，只係差證據。既然兇手係為香港遇害既人報仇，咁一定係香港人，而最近加入我地既香港人就只有小七同埋呀風。我好矛盾，證據指向佢地，但我又唔想係佢地。
另外，個個醫生同差佬都係過35歲既成年人，佢地係點樣扮成小七或者呀風咁既年輕人。唔理點都好，我都要查下佢地。
呀風曾經冒生命危險救過我，小七表現成有社交障礙咁，兩個都唔太似，但呢個都係我主觀既意見。或者，小七只係係到扮有社交障礙，令自己感覺缺乏攻擊力，減少暴露既機會，亦從而接近我。諗到呢到我就更加驚，一個我想幫助既人，可能要置我於死地，甚至害死我最重要既人。因此，係件事攪清楚前，我諗我要同佢地保持距離，為免自己泥足深陷。
我分別係佢地兩個間房裝左針孔攝錄機，宿房走廊、療養室走廊都裝左。呢個行為，我要好小心，因為就算我係為左查內鬼而裝攝錄機，都係唔允許既！係怕基地被襲擊既時候，錄影落左軍方手，會成為罪證。但為左查出真兇，我逼於無奈都要咁做。
因為呀Q既死，加上縮窄左兇手既範圍，我開始將怒火遷怒為呀風同小七身上。有次係走廊撞到小七，小七同我打招呼，我就用膊頭撞開佢，迎面無視佢走過。佢就傷心咁望住我遠去。
係佢地房間裝左攝錄機後，我就開始觀察佢地既日常生活。呀風係房做既野好正常，冇咩特別。而小七，我點樣先知佢係咪扮野。但事實佢都冇咩問題，佢真係有社交障礙。
有一晚，我係電腦屏幕睇小七係到做緊物，我已經留意到小七係房係唔開燈既，咁係因為佢可以隨時扮自己唔係房。我見過有人敲門搵佢，但佢一d聲都唔出，扮唔係房。有時又會企左係到猶豫開唔開門，但通常都冇開到。我又通過攝錄機見到佢係走廊行行下見到有人係遠處，就匿埋左，等人地行過左，佢再行。觀察得出佢係典型拒絕同外界接觸既社交障礙人士，並唔係扮既。觀察左幾日，見到佢地都冇埋異樣，唔知點解我鬆左一口氣。反正，療養室都裝左攝錄機，兇手如果再出手，就會落網。於是，我冇再監視佢地。
好耐冇搵小七，有晚，我去左敲佢房門：「小七，係到嗎？我係Nir！」
小七好快咁開左門，係帶住驚喜既笑容。我見到佢都滿意咁笑左笑，因為佢冇拒絕同我既接觸。我地係佢間房坐底左，佢期待咁問：「Nir！你唔嬲我啦！」聽到佢咁問，我好內疚，我竟然懷疑佢，佢係組織入面可以話只係同我比較熟，但我就懷疑佢，令佢呢幾日咁唔開心。
「小七，對唔住。我唔應該遷怒於你。」
「唔緊要！我知道你一定好難受。」
佢依然係咁體貼善良，我個心就覺得更內疚！對於佢既體諒，我拍左拍佢搏頭以示感激。
我因為係攝錄機觀察到佢既隱蔽，我問佢：「小七，你社交最近好似冇咩進步！」
佢聽到之後迅間變得失落，行去瞓左係自己張床上面，背對住我講：「Nir！對於我黎講⋯社交係消耗能量，我好攰。」佢好似小朋友咁扭計。
「咁我呢？你同我相處消耗能量嗎？」
「你⋯係⋯我屋企人。」
佢講完呢句，我望過去，佢已經瞓著左。於是我小心翼翼咁關埋門，走左出去。而而家既我竟然為左小七一句既屋企人而覺得開心。
走既時候，我撞到呀風係空地食煙，神色好似好煩惱咁。我行左過去叫佢。
「風！咁夜出黎食煙既！」
「嗯！」
「係咪有咩煩，見你好愁咁！」
「冇！」佢苦笑。
我地靜左一陣，佢突然又講：「今朝處理屍體既時候，紗布突然甩左，我見到⋯（又苦笑左一下）有d吃不消。」我見到佢深呼吸，似乎係受到好大既驚嚇。
最老套既安慰，我同佢講：「時間會沖淡一切。」
佢靜左一陣，問我：「Nir!你仲記唔記得自己原來個樣？你覺得而家呢個樣係你自己嗎？」
我係心口個袋拎左張相出黎話：「我記得，我隨身帶住張相。不過我覺得我無論個樣變成點，我就係我⋯呀Q⋯佢係咁講。」
呀風拎左我手上既相黎睇：「係，你就係你，你地一d都唔似。」
之後呀風踏熄左枝煙，我地就各自走左返房休息。到第二朝梳洗，照鏡既時候我發覺條鏈唔見左，我好緊張咁去左小七間房搵，但搵唔到。小七就陪我去尋晚呀風食煙既空地搵。
我見到尋晚呀風食煙既位置既草地黑左一片，似乎被燒過黎，大概係風既煙頭熄唔曬，攪到燒左d草。小七衝過去執起條鏈。
「Nir！條鏈燒黑左，不過條鏈純銀，抺下應該冇事啦！」小七抺左抺熏黑左既頸鏈，銀色就走返出黎。但我就驚訝咁望住小七手上既頸鏈。
如果呢條鏈會被熏黑，咁點解我執到佢既時候依然咁乾淨。
細佬，你究竟想點？
待續～
黑柴的話：
點解咁驚訝？
見「第一季」第13話
『突然，一個閃令令既野吸引左我既注意。炸彈既催殘對條頸縺一d作用都冇，條鏈依然閃爍，奪目咁掛係佢身上。』
因此，「家姐」執到條鏈咁乾淨既原因只有一個，有人突登放落去。
其實我第一季就想賦予細佬主角光環。
而家兇手呼之欲出，由第二季第一章開始都舖排左好多線索，唔知大家留唔留意到。
有興趣可讚黑柴Facebook
同步更新
https://www.facebook.com/%E9%BB%91%E6%9F%B4-879053098899020/