我發現左我呀哥成日對住部電話講一種我聽唔明既語言: 13.第一季結局_了結
個日上飛機之前，呀穎用短訊sd左段野比我：言，換面手術本身就要冒極大既風險，少少既感染就可能引致排斥，作為一個醫生，我相信做手術既時候，無論係換面個個定被換面個個都需要有良好既狀態。如果，假如，你真係走頭無路，你可以自毁，咁樣未必會救到你，但至少會為你爭取到小小時間。
我唔希望你行到呢步，等你返黎。
我慢慢擘大眼，發覺自己瞓左係張床到。我坐起身，面上既痛楚令我感受到自己仲生存緊。好明顯地，我已經比人困住左，我望一望周圍，有枱，有紙筆，有鏡，有梳洗用品，有尿盆。因為包圍呢個間隔既只係一枝一枝垂直既柱，可以清楚見到外面既環境。
我間野對出就係長長既走廊，一間一間囚禁人質既房排列係無盡既走廊。
呀樂就係我旁邊既位置，隔住鐵欄，我見到佢瞓左係床上，面上覆蓋左紗布，紗布上面仲有滲出濃濃既血色。
「呀樂！」我嘗試叫一叫佢。
佢擘大左眼，冇望過黎，只係望住天花板。
我繼續講，語氣之中難掩悲痛：「對唔住！呀樂，對唔住！我真係好後悔帶埋你黎，係我連累左你。如果你怪我，我都冇話可說。我劃花你塊面，只係抱住一絲既希望，為我地爭取多d既時間。」
我一面講，一面見到有眼淚由呀樂既眼角留左落黎。
突然，呀樂坐左起身。拎左枱面既紙筆係到寫野，寫完之後比我睇。
上面寫：「我唔怪你，我明你點解要咁做。」
我呆左咁望住佢，佢繼續寫：「我唔想講野，傷口好痛。」
的確，我每講一個字都會牽動我既面部肌肉，令到傷口好痛。
「至今，我都諗住同你一齊走，唔好放棄！」佢繼續寫，用眼神堅定咁望住我。此時此景，真係無聲勝有聲。
之後個一個星期，我都開始了解呢個監倉既規律。有人會黎送一日3餐比我地，只係透過鐵欄間既空位遞入黎，從來唔開門。我地自己既傷口清潔消毒都係佢比物資我地自己處理，種種措施明顯係為左防止人質逃走。
但係每日我都會見到有人黎搵班人質傾計，問一d佢地既家庭背景，個人經歷既事。個時我就知道，佢地係為左殺戮或者模仿而做緊準備。
我問我對面個個人質：「你知唔知佢地點解問你咁多私人野？」
佢答：「佢地懷疑我係美軍派黎做卧底，佢話查清楚就會放我走。好多人都係因為同佢講曬自己既事，證明自己既清白而被帶走放走。」我聽到佢語氣中有絲絲既希望同愉悅。我同呀樂對視，唔知應唔應該講真相比佢知。但如今死路一條，或者無知會更快樂，所以我地都選擇左沈默。
而入左黎成半個月，我都冇見到「家姐」。係既，佢都冇必要黎見兩個想攞佢命既人。
觀察到佢地嚴謹既措施，我地根本無辦法逃走。但我諗到一個方法，就係令自己無法自理，咁佢地就一定要開門入黎幫我。我收埋少少剩飯剩餸，放埋一二邊幾日，即刻臭曬，好粟。我將個d野敷左個傷口一晚，第二朝即刻成個人頭暈暈，睇黎都係傷口發炎，令我有d發燒。可惜，我諗得班恐怖分子太仁慈，佢地冇理過我既死活，只係比左d藥同消毒用具比我自己攪掂。而我既狀況就每況愈下，傷口流濃，每朝起身只覺得越黎越暈，最後連床都落唔到，非常虛弱。呀樂就係旁邊睇到好著急。
唔知係咪因為大限將至，有一晚，我竟然夢到我家姐。
夢入面佢走到我床邊同我講：「究竟你有幾恨我，先追我追到黎呢到？」
我捉實佢隻手講：「家姐！家姐！我好掛住你。」
佢就摸下我塊面問：「係咪好痛？」
我問佢：「咁你呢？你痛唔痛呀？」
佢眼濕濕咁講：「唔痛！」
我微笑對住佢講：「咁我都唔痛。」
醒返之後，我發覺自己個傷口換左新既紗布。我問呀樂：「佢黎過？」
「邊個？尋晚有個男人開門幫你換。你見好d未呀？」
「好好多啦！」睇黎係我諗多左。
其實，呀樂個晚望住「家姐」照顧呀言，「家姐」走既時候，呀樂同佢講：「我睇得出你係關心佢既，比條生路佢好冇？」
「比埋我條命你好冇？」「家姐」冷冷咁應左句就走左。
的確，我地對佢黎講係後患。
又唔知過左幾多日，有人入黎送飯既時候。「家姐」突然跑入黎，大叫：「 空襲，1公里，走。」
送飯既人聽到之後即刻丟低曬d野，跑出走廊既盡頭。
被囚禁既人質都紛紛行向門口大叫：「放我走，我唔想死呀。」但係都冇人理佢地，由佢地繼續留係到等死。當確保所有恐怖分子都離開左監倉，「家姐」行左去我個房前面，用憂傷既眼神望左我一眼就走左。點解？我唔明，唔通佢會唔想我地死，冇可能！
「呀言！你睇下！」d人走曬之後呀樂叫我，手指指向岩岩「家姐」企既位置。我見到有一串鎖鑰係地下。幾時係到架？我岩岩一直都留意唔到。我即刻執起鎖鑰開左自己道門同放呀樂出黎。
「轟轟⋯轟轟」
我聽到炸彈既聲音，而且越黎越大聲，震動越黎越近。
「呀樂，你走先！我放埋佢地先走！」我同呀樂講。
「要走一齊走，比d我，我去開個邊。」佢拎左一部分鎖鑰。
「呀樂！陣間有危險你一定要走先，唔好理我。求你，千奇唔好猶豫。」我同呀樂講。
佢點頭。
呢刻，我心諗一生中有一兄弟如此，真係死而無憾。
我地分開兩邊，一路開鎖，放走左好多人出黎。
「轟轟⋯轟轟⋯」
一個炸彈投落係監倉到，炸到一部分既監倉溶溶爛爛。
「呀樂，走！」我大嗌。個刻我已經由炸爛既天花望到又有一個炸彈投左落黎。
「轟轟⋯轟轟⋯」
「呀言⋯呀言⋯唔好呀！」呀樂崩潰咁大嗌！
「呀⋯⋯」呀樂冇跑向我到，癲左咁大叫，一面向出口方向跑走。
我好多謝佢，有聽到我講，毫不猶豫咁走。
--------------------------------------
以下為「家姐」角度︰
空襲逃亡既時候，我突登放低左鎖鑰比佢，我都唔知點解自己會咁做。我係防空洞聽住外面「轟轟隆隆」既炸彈聲，心入竟然希望佢走得甩，我覺得自己真係好可笑！
當出面回復平靜，我同同伴一齊走出防空洞。腳步不自覺咁行向監倉方向，行到監倉，雖然個到炸到溶溶爛爛，但我都見到好多房空左。心諗，佢都自身難保，仲去救人。我慢慢行入去，見到好多燒焦既屍體，單憑外表已經分唔到邊個打邊個。我依然一個個去望，因為我唔想見到佢。
突然，一個閃令令既野吸引左我既注意。炸彈既催殘對條頸縺一d作用都冇，條鏈依然閃爍，奪目咁掛係佢身上。我摸摸自己濕左既面頰，連我自己都唔知道點解我會流眼淚。我係佢旁邊蹲低，拆左條鏈，戴左係自己身上。
腦海浮現佢曾經講過：「至少，就算我『家姐』係個個地方出世，佢都一定唔會咁做！」
「或者，我真係可以相信你。」
--------------------------------------
#黑柴的話#
大家仲記唔記得上1章有講到︰走之前，我係家姐房拎左一條銀色既頸鏈，係呀哥送比佢既生日禮物，家姐一直珍而重之。我戴起佢，心中默念：家姐，請你保佑我盡快搵返你塊面。
條頸鏈真係保佑細佬搵返家姐塊面，只係用左另一種方式。
終於迎黎第一季既結局，最近比較忙。應該會抖返兩個星期先再寫。
構思緊下季用「家姐」既角度寫落去，一切仍處於構思階段，隨心。
#有興趣歡迎讚黑柴Facebook
https://www.facebook.com/%E9%BB%91%E6%9F%B4-879053098899020/