我發現左我呀哥成日對住部電話講一種我聽唔明既語言: 8.面歸原主

「我叫黃sir，呢個我電話，有事搵我。」個個中佬呀sir走既時候同我講，同抄左佢電話比我。

當日各大電台，報紙都報導左呢件事。一個詳細既受害者名單都登左係報紙，大約百幾人，有好多不同職業既人，較令人震驚既係某幾位受害者既身份。
有一位係幼兒園老師，連帶幾位學生既家長。
有一位係香港十大富豪之一個仔李卓天，佢遇害既消息令佢呀爸間公司股市大跌。
亦有黃sir個女，身為警察世家，但個女仍落入恐怖組織既陷阱。

另外加上呢單野恐怖分子既手法十分殘忍，引起社會好大既迴響，好多人要求政府恢復死刑，要將班恐怖分子置於死地。我都贊成，我想佢地死，我想佢地死！而件事並冇因為搵返家姐呀哥條屍就告一段落，伴隨而黎既係一股悲痛欲絕既陰霾，呀爸呀媽除左因為呀哥家姐既死而非常傷心，亦因此而覺得自責。

呀爸呀媽決定唔攪任何喪禮儀式，盡快比呀哥家姐入土為安。而且佢地而家既情況都根本無辦法比人瞻仰遺容。但我死都唔比家姐呀哥咁快落葬，我要佢地拎返塊面先落葬。父母因為我既激烈反對覺得好無奈，大概佢地都覺得我地冇可能拎得返家姐呀哥塊面。之後既日子我同好多受害者家屬都為左討回公道，為左拎返親人塊面周圍奔波。





因為情況特殊，「呀哥」死左，而佢又冇人冇物，冇人反對我幫呀哥拎返塊面，個法官係事發一星期內就判左我可以拎返呀哥塊面。但係，我跑左幾間醫院，都冇醫生肯接手去割返呀哥塊面皮落黎，大概個個都想做仁醫，覺得咁做太殘忍！
但係佢地又有冇諗過，我「呀哥」就係遭受咁殘忍對待而死既！而我而家只係想幫佢拎返屬於佢既野，咁都有錯咩？
最後我唯有係報紙同網上登廣告重酬請醫生幫手，終於有一位醫生聯絡我。我心入面好激動，我呀哥終於可以入土為安啦！我同醫生見面既時候，我問佢：「請問你想要幾多報酬？」
「唔需要。」
聽到佢咁講我好驚訝，佢又繼續講：「我呀妹都係呢件事既受害者，你既心情我比任何人都明白。」我見到佢明顯抑壓自己既情緒。
「多謝！」

手術進行緊既時候，我一路係出面好緊張咁等。「手術」，其實我都唔知應唔應該咁稱呼，因為呢個手術係係兩個死人身上動刀。做手術前，醫生問我拎左張呀哥生前既近照，大概想盡力幫呀哥回復原貌，但無論最後點，我都感激佢。





醫生出黎個樣好攰，佢同我講：「言，我盡力啦！你入去睇下。」
我即刻入去睇下呀哥，我望到佢個樣，我真係忍唔住喊左出黎，其實兩條屍都有萎縮腐爛既情況，我都預計還原度會唔夠50%。但出黎既還原度有6成，我聽醫生講「呀哥」後腦有一條10cm長既疤痕，當初做換面應該就係後腦開刀，方便用頭髮掩蓋疤痕。而佢話佢都會係個到開刀，我睇得出醫生刀功好好，呀哥塊面皮完全冇破損，但因為屍體委縮既情況，呀哥塊面有好多唔平整既地方，凹凹凸凸。我覺得好委屈，我真係為左呀哥而覺得好委屈，佢根本冇理由要受d咁既苦。但至少我都幫佢拎返塊面，呀爸呀媽都可見見佢最後一面，我個心安落左好多。

而家只淨返家姐。

鈴鈴～～鈴鈴～～
我接起通電話
「喂！」
「你好！我係重案組呀sir，請問你係唔係余家言先生？」
「我係！」




「之前假扮你『家姐』個人落口供咩都唔肯講，但佢話想見你，你會唔會想見下佢？」
「好！」
「你可以選擇唔見佢架！我只係循例問下你，你唔想見可以唔黎。」
「我想見佢！我想見！」

待續

#有興趣歡迎讚黑柴Facebook
https://www.facebook.com/%E9%BB%91%E6%9F%B4-879053098899020/