我發現左我呀哥成日對住部電話講一種我聽唔明既語言: 5 收屍

「呯！呯！呯！.........呯！呯！呯！」

好幾個人跪左係地下，一班飛虎隊好有隊形咁衝左入黎，將成班恐怖分子制服。有幾個掙扎想逃走，但都冇用。「家姐」顯得好驚訝，而呀樂忍住痛咁對住「家姐」講：「你唔係以為我地兩個會on99咁一d準備都冇就跟你入黎呀麻？」
黎之前我地已經報左警，但估唔到會成隊飛虎隊黎左。之後聽返，原來政府好早之前已經收到有恐怖分子匿藏係香港既消息，所以一直有暗中調查，而警隊收到我地既報案就大為緊張，即刻部署準備。我同呀樂就因為咁而執返條命。
其他人聽到呀樂既說話都覺得好憤恨，用怨恨既眼神望住佢，而「家姐」聽左就好絕望咁既樣。之後，一個個恐怖分子就比飛虎隊押走。

而我冇理到佢地，我慢慢行返去家姐呀哥條屍到，繼續嘗試將佢地放落黎。有個飛虎隊成員行左過黎同我講：「唔好破壞現場環境，陣間會有伙計黎調查。」
我冇理到佢，繼續嘗試搬。
佢拉一拉我膊頭，叫左聲：「喂！」
我都冇理佢，佢之後好大力咁拉住我，我好嬲咁將佢推開。其他飛虎隊隊員見到咁既情況，幾個人過黎拉住我，我不停掙扎，大叫：「比我放佢地落黎，比我放佢地落黎呀！」




「冷靜d。」佢地幾個人拉住我，其中一個叫我冷靜d。
推拉之間我比佢地撞左落地下，佢地以為我想起返身衝過去，想過黎禁低我。點知，我一野跪左落地下，額頭貼住地下咁向佢地叩頭，喊住咁大嗌：「比我放佢地落黎，求下你，求下你⋯我家姐佢好痛，我家姐話佢好痛呀，佢好痛，佢話好痛呀⋯⋯嗚⋯⋯唔該你，我求下你地⋯嗚⋯」
個幾個飛虎隊成員聽到呆左，停低曬，冇再制止我。而呀樂見到我咁都忍唔住喊，佢忍住槍傷行左過黎，想幫我放返佢地落黎。有個大粒野行左過黎示意叫隊員幫手放佢地條屍落黎，終於將佢地放左落黎。我望住瞓係我面前既呀哥家姐，望住佢地血肉模糊既頭，我一d都唔覺得恐怖，一d都唔驚，只係覺得好心痛，係撕心裂肺既痛。我抱住佢地屍體大喊，喊到成個人抽搐咁。喊住問嗌：「家姐呀⋯⋯呀哥呀⋯⋯唔好呀⋯⋯返黎啦！醒下啦！求下你地，求下你地。點解呀？⋯點解呀？佢地點可以咁對你地？點可以？」
呀樂企左係我旁邊一面望住我，一面喊。佢都識我家姐，至少每次佢黎我屋企，我家姐都好熱情友善咁招待佢。呀樂一面喊，一面除低身上件外套，將件衫蓋左係我家姐身上。
我喊到收唔到聲，攬住家姐，我望到佢背隻比勾勾住既傷口，好大好深。
仲記得以前同家姐一齊睇過一套恐怖片，叫「德州電鋸殺人狂」，入面個殺人狂又係好似d恐怖分子咁將d人用勾勾起個背隻掛係到。家姐睇完之後驚左幾日，之後每次提返起套戲，佢都下意識摸下自己背隻，我個時仲笑佢細膽到物咁。
我用手覆蓋住家姐背隻個傷口，攬住佢，係到講：「係咪好痛？冇事啦！冇事啦！而家冇事啦！」我好似癲左咁安撫家姐條屍。
當危機解除，我個人一放鬆，我既情緒好似火山爆發咁一發不可收拾。
周圍d人都睇到好心噏，又唔敢行過黎攪我。





到飛虎隊成員同呀樂做左個初步既包紮，呀樂唔肯自己去醫院治療先，堅持要陪住我。佢行過黎，由後面攬住我，同我講左聲「對唔住」，傳遞比我無限既安慰。其實件事根本唔關呀樂事，但佢知道我想要既係幫家姐，幫呀哥討一個公道，需要兇手既制裁同道歉。呀樂而家只係盡佢能力安撫我。我望住呀樂既槍傷，深呼吸平復一下自己。
我飲泣咁同呀樂講：「等我送左佢地上車，我就同你去醫院。」
呀樂點下頭。
我送左家姐呀哥上黑車之後，我醒起有個好重要既問題，我行左去搵大粒野問：「我『家姐』同『呀哥』塊面，要點先攞得返呀？」我抑壓住自己，摸住心口講，我個心實在太痛。我唔想佢地死無全屍。
「呢個我都答你唔到，我地未遇過咁既情況，會睇下上級有咩安排，再聯絡返你。」
佢講既說話又係對我一大打擊，我仲要等幾耐，佢地已經死得夠慘，唔通要佢地九泉之下都冇面見人。

同呀樂上左白車，我一路諗，其實我根本冇可能拎得返家姐呀哥塊面。香港係一個講人權既地方，罪犯都有人權。佢地一日未死，我都冇可能拎得返佢地塊面。其實就算死左都未必得。諗到呢到，我即刻打左個電話比係屋企守住「呀哥」既呀峰。

「喂！呀峰，有野要你幫忙，你一定要幫我。」




「呀言！你地冇事呀麻？搵到你家姐呀哥未？」
「你咩都唔好問住，可唔可以幫我帶個個人去天台先？警察黎緊我屋企，你地行樓梯避開cctv。」
「做咩呀？發生咩事？做咩要避警察？」
「陣間再同你講。求下你帶走左佢先。」
「好！」

待續

#有興趣歡迎讚黑柴Facebook
https://www.facebook.com/%E9%BB%91%E6%9F%B4-879053098899020/