[有沙入眼]是咁的，我覺得我住嗰度有啲唔妥: 233摯友

我同吳非凡執走工作室嘅所有研究資料、試驗程式同手稿。

二十年嘅份量，足足裝滿咗廿幾個紙皮箱。如果唔係非凡出錢租車，都唔知點將啲資料運翻去例得村。

係時候⋯⋯放棄喇。

「你而家……知我係邊個啦？」

雖然喺研究過程中，非凡已經知道月曦嘅存在，但佢一直都唔知我嘅真身。



我係金月晨，破產嘅「恐怖體驗」創辦人。

「我知。你係金仔。」

「吓？」我以為自己聽錯，轉身望向幫我將最後一個紙箱封上膠紙嘅吳非凡。

「依個一直都係你嘅願望，唔係咩？」

非凡，我嘅遺憾係……我無辦法成為最重要嗰個人嘅金仔，無辦法拯救月曦。



「係⋯⋯但係我嘅願望始終無成真。多謝你陪我浪費咗廿年嘅時間⋯⋯好對唔住⋯⋯浪費咗你廿年嘅青春⋯⋯最後一切都係白費心機⋯⋯夢⋯⋯要完喇。」

咚。

胸口發出輕輕嘅悶響。

「仲未完架，你仲有將佢拯救嘅機會，破產唔代表完結。」

吳非凡嘅拳頭撞落我嘅胸膛，力度唔大，但胸口入面，好似受到一種難以形容嘅衝擊。



「但係……我地無錢再繼續研究。」

吳非凡拎出自己嘅存摺︰「依度係我廿年嚟儲起嘅人工，我諗應該仲可以支持我地一段時間。」

嗰一刻，我講唔出野。

一個非親非故嘅外人，甚至唔係異性，亦從來無表示對我有好感嘅男人，到底係咩推動佢奉獻哂所有野嚟支持我？

「咁又係咩推動你，奉獻一切做研究搞到破產？」

「點同呢，嗰個係我⋯⋯」我都未講，吳非凡就接咗落去：「最重要嘅人吖嘛。情人又好，親人又好，親戚又好，朋友又好，其實依啲稱呼係點都無咩所謂，只要係最重要嘅人，就足以叫我地奉獻一切。」

佢托一托眼鏡，向我露齒笑：「你就係我最重要嘅人，我話過陪你行依條不歸路，就會行到底為止。」

我咬住下唇，忍住喊出聲嘅衝動。



幾多人，用盡一生嘅時間都搵唔到一個將自己視為最重要嘅人。但我已經搵到，就係我面前嘅吳非凡。

有一刻，我覺得佢同我好似。

大家都為最重要嘅人努力。

有你陪住我⋯⋯總覺得⋯⋯有翻力量繼續行落去。

「但係⋯⋯我無咩可以報答你。」

「我唔係要你報答我。如果我有咁嘅諗法，又點可能陪你廿年？」

咁嘅朋友，到底邊度搵？



「同自己講，就嚟成功架喇，唔好放棄。」

吳非凡拎出手機，開始播歌。