[有沙入眼]是咁的，我覺得我住嗰度有啲唔妥: 231日久必見人心

吳非凡對我完全唔了解，我向佢講嘅名係假嘅，仲有好多好多對話，我都為咗隱藏身份而特登講大話呃吳非凡。

我咁做係因為我雖然好感動，但講真仍然未能夠完全信任佢。幾感動都好，對相識無耐嘅人付出所有真心，係好不智嘅事。加上我同佢身分懸殊，成件事就更加危險。

如果佢知道我係恐怖體驗嘅創辦人，咁只要向外爆料話我用錢開發不切實際嘅新型意識植入技術，就會對公司產生負面影響，股價即刻跌唔知幾多成。

以正常人嘅角度去思考，沽空股票，爆料做低股價就可以輕鬆發達。但陪我改良意識植入技術，就要付上自己十年、幾十年嘅心血時間，甚至最後可能會失敗。而就算技術研發成功，都無商業利益可言。即係話，無論新植入技術成唔成功，吳非凡都係做吃力不討好、毫無回報嘅工作。

用吓腦都知道出賣我嗰條路有幾舒服，而陪我研究嘅路到底有幾崎嶇。所以我唔可以一開始就開門見山話佢知，我就係恐怖體驗嘅創辦人——金月晨。



我要等，因為佢嘅陪伴係真定假，時間一長就見真章。

依個世界有幾多人嘴上講會陪你一生一世，結果轉眼已成陌路人？

日久必見人心。

「非凡，你唔好奇我地嘅研究經費係喺邊度嚟架咩？」佢將熱咖啡放喺我枱面，擰吓頭，又翻自己位做野。

「非凡，你唔好奇我要改良植入技術係為咗邊個咩？」我望向非凡個位，佢又漸漸變得透明。



如果我唔打醒十二分精神，有時真係好難注意到佢個人到底喺邊。所以我成日撩佢講野，起碼聽到把聲我就可以確定佢真係喺度。

「阿金，我真係唔好奇呀。」

「唔通你唔覺得我有好多野瞞住你咩？你咁都仲心甘情願日日嚟幫我做研究，你唔會不安咩？可能我放工就變做連環殺人犯。」

吳非凡突然出現喺我面前，嚇咗我一跳。

「阿金，你想改良意識植入技術，令植物人嘅意識都可以登入虛擬世界，依個諗法係呃我架咩？」



關鍵嘅時候，非凡嘅眼鏡總會啱啱好反光，令我睇唔到隱藏喺鏡片背後嘅眼神。

我舉高雙手投降︰「無呃你，唯獨依個願望，我可以話你知我一定無呃你。」

吳非凡托一托眼鏡，露出微笑︰「咁咪夠。」

令人安心嘅微笑。

無論我試探佢幾多次都好，吳非凡都無對我刻意隱瞞嘅身份、過去同動機有過任何越界嘅好奇心或者懷疑。

「你問我想唔想知，話完全唔想就假嘅。但我覺得，既然你選擇咗瞞住我，咁一定有你嘅理由。嗱，我唔知你嘅身份，對我而家嘅研究又無影響嘅，係咪先？咁唔知都無咩所謂吖。」

「你真係唔怕畀我背叛咩？」

「係你怕畀我背叛，先隱藏自己身分咋喎。我驚咩？又無咩好失去嘅。再講——」吳非凡露齒笑︰「如果背叛我嘅係你，我唯一嘅視線，我心甘命抵。」



「吓⋯⋯？」

「係你令透明嘅我，重新有翻實體。所以唯獨你，即使被你背叛都無所謂。」

我一吓手刀哼落佢頭頂︰「白痴，唔好好人到咁樣得唔得？」

吳非凡露出天真嘅微笑，好似昔日萬聖節同媽媽講「trick or treat」咁。

「咁依個世界上，總有人，係令你覺得就算畀佢傷害，都心甘命抵家嘛。」

我抱胸擰轉身︰「放心啦你，我係對你有隱瞞姐，唔會傷害你。總有一日我會講哂所有事畀你聽。」

傷害依個傻仔的話，我真係人渣都不如。



「咁我慢慢等嗰一日喇。」