[有沙入眼]是咁的，我覺得我住嗰度有啲唔妥: 186海

貞子嘅身體有一半爬出電視。

我亦同一時間起步跑向露台，趕上月曦嘅步伐。

之前每次都無辦法離開例得村大廈，走出屋企就會去到走廊，走廊盡頭係後樓梯，而樓梯無論上落都會去翻原地。難得有一次可以用新嘅方法逃走，雖然唔知跳出去係會跌死定點，但絕對有搏一搏嘅價值。

話唔定，咁樣跳出去就可以直接登出？

我捉住月曦隻手：「跳呀！」



月曦都唔理得咁多，友我捉住佢，我地就咁樣兩個人跳咗出窗外面。

「嗚呀呀呀呀呀呀呀呀！！！」

下墮，一片漆黑。

下墮，一片漆黑。

下墮，一片漆黑。



唔知向下跌咗幾耐，無論上下左右前後都係一片黑暗，我憑右手嘅觸感先可以確認到自己捉住咗月曦。

一陣落水嘅聲音濺起，我同月曦跌咗入水中。

嘗試張開眼，神奇嘅係雖然身體嘅感覺係喺水中，但海水無令雙眼唔舒服。仲有就係我地可以正常咁呼吸。

海中所見嘅野，令我「嘩」咗一聲。