[有沙入眼]是咁的，我覺得我住嗰度有啲唔妥: 169三個一齊
「快架喇，快架喇。」阿婆諗一諗，問：「你係咪聽日飛喇？」
「係呀，去三日，好快就翻。」三日，好似好快就過，但幸福要消失，只需要一瞬間。
阿婆喺枕頭底拎咗張相出嚟：「畀你，護身符。」明明唔知遙控器喺邊，但偏偏記得枕頭底有張相，仲記得畀我。
相入面，係喺例得村下面條街影嘅。阿婆企喺一高一矮嘅我同Lucy後面，左手撘住我，拎手袋嘅右手撘住Lucy。
微笑嘅婆婆，好似我地兩個嘅守護天使。
「保祐你架，平平安安翻嚟我整紅豆沙過你食。」
我將張相收喺心口個袋：「正喎。你都好耐無整畀我食喇。」
「仲有阿妹。等你翻嚟，三個一齊食。」
「勾手指尾。」我伸出手指尾。
「你唔驚我勾斷你隻手指咩？我咁大力。」
「驚呀，唔該你細力啲。」
「傻啦，邊捨得。」
勾手指尾，勾過就係，講過就算數。