[有沙入眼]是咁的，我覺得我住嗰度有啲唔妥: 168仲好好力水
「悶唔悶呀，開個電視你睇吓。」
由於醫院普通床位滿咗，所以阿婆好難得咁可以入住私人房，收費依舊。病房入面有獨立廁所，床對面仲有電視。
阿婆一隻手重複揸拳頭，鬆手嘅動作，另一隻手就摸吓拍吓張床，好似搵緊咩咁。其實，個遙控器喺佢床前張枱度。
「唔悶呀，唔駛開電視啦。係喇，做咩揸吓揸吓個拳頭咁？」
「今日狀態好似唔錯，畀隻手我試吓力吖。」
我伸出手，阿婆粗糙嘅手心捉住我嘅手腕，有種畀沙紙環住皮膚嘅刺痛。阿婆施力，其實唔係好大力，我都即刻叫：「嘩嘩嘩！痛！」
「哈哈，阿婆隻手仲好好力水。」
「手都畀你揸斷。」
「哈哈，咁誇張。」明明笑緊，但係仍舊雙目無神，好似上下半嘅面容分開活動咁。
「真呀，狀態咁好，好快出院架喇。」