[有沙入眼]是咁的，我覺得我住嗰度有啲唔妥: 157尖端
要比較的話，其實未到末期嘅癌症比末期癌症更可怕。因為有得救，對阿婆同我地兩兄妹嚟講，都係一種肉體上同心靈上嘅折磨。
末期癌症，患者嘅死亡速度可以好快。生命力強啲嘅人捱到半年都已經喺時候迎接今生嘅終結。
但仲有得救的話，眼前嘅路就係名為希望嘅黑暗。
你唔會知用咗嘅錢換嚟嘅治療同藥物係咪有效，你亦唔知仲要投放幾多錢落去先會醫得好。睇住無收入只有支出嘅儲蓄戶口，每日就會被「用哂錢」嘅不安所籠罩。
我同細妹亦由嗰時開始，更加努力打工搵錢。照顧自己之餘，淨低嘅就存入銀行，問題係用錢嘅速度實在太快，根本補唔切。
然後就睇住本身又肥又多肉嘅阿婆，因為化療慢慢消瘦落嚟。佢食乜嘔乜，想唔瘦都難。
唔嘔嘅日子，又會因為味覺受藥物影響而無哂感知甜酸苦辣嘅能力，所以無胃口。就連我地偷雞帶一塊pizza畀佢，諗住佢最鍾意食架啦，實會食翻野，點知佢都只係咬咗好細啖。
以往大時大節難得一餐叫pizza，阿婆都可以食兩塊。但而家嘅佢，只有能力咬走塊pizza嘅尖端。
「你兩個都⋯⋯乖喇，擺低吖⋯⋯我聽日食。」
「聽日拎塊新嘅畀你啦。」
「唔好⋯⋯哂錢喇⋯⋯反正⋯⋯都食唔哂。」
就算想做啲咩令阿婆舒服啲，都只會見到佢向我地微笑，然後多謝我地嘅心意。但係，食唔落就係食唔落，我地根本無能為力。