[有沙入眼]是咁的，我覺得我住嗰度有啲唔妥: 145變翻BB
意識翻到當下依刻嘅時候，右手右腳重新接合，口入面嘅牙生翻出嚟，但都係得右邊。
「牙亞呀⋯⋯」我嘗試發聲，但聲帶未完全回復正常。
我嘅身體，得右邊好翻，左邊嘅傷完全無好過。
面前嘅阿婆面上好似未剝清蛋殻嘅蒸雞蛋咁，僵硬嘅碎片雖然佈滿裂痕，但未全部脫落。
佢只露出緊閉嘅右眼，同左側面頰。
甩啲唔甩啲嘅碎片令佢嘅面容更加恐怖。
轉身，啪，拖鞋重擊背後嘅Lucy。
佢受到突如其來嘅攻擊，完全反應唔切，頭撞落旁邊嘅牆上，成個人跌喺地下。
Lucy揞住出血嘅額頭，阿婆無視佢，腳步好似一個生鏽機械人咁拐拐吓，行入廚房，拎出菜刀向Lucy進逼。
「點解⋯⋯會咁？」
Lucy喺地上退後，但本身就唔大嘅空間無幾多位畀佢退，好快就無路走。
「變翻BB⋯⋯變翻BB⋯⋯」近乎瘋狂嘅聲音。