[有沙入眼]是咁的，我覺得我住嗰度有啲唔妥: 142歲月

「咁如果以後又有曱甴，阿婆你會唔會幫我拍佢地？」

「會呀，不過你要應承阿婆少少野先。」

「咩野？」

「如果阿婆唔喺你身邊，你要自己拍。」

「阿婆點解會唔喺我身邊呀⋯⋯嗚⋯⋯」Lucy啲眼淚又開始蘊釀。



因為依個世界，無老人家可以見證自己個孫老死。

「哎呀，咁可能阿婆沖緊涼，去咗廁所，咁你就要自己面對架喇。」

阿婆總係用最溫柔嘅大話，說服細個嘅我同妹妹。

現實嘅殘酷無情，我地遲早都會親身體驗到，或者係因為咁，阿婆先為我地同現實之間建立一段幻想嘅距離。

唔直接講出事實，只係想保護我地今後嘅人生之中，再無可能拎得翻嚟嘅童真。



我地都曾經以為，阿婆會一直陪住我地。

直到歲月將我地分開。