[有沙入眼]是咁的，我覺得我住嗰度有啲唔妥: 134應該點

「阿婆無呃你膝頭哥唔食辣椒醬架。」阿婆嘅尾指勾過嚟，引導我行過去。

「細妹將媽咪，送咗入我地個心。只要唔好忘記，媽咪就一直喺入面陪住我地。」

淚水唔受控制，我大啖大啖吸氣，喊到好似哮喘發作咁：「嗚⋯⋯點解⋯⋯點解細妹要送媽咪入我個心⋯⋯」

「因為佢想報答為佢出世而離開嘅媽咪，所以將禮物送去我地個心。細妹送哂畀我地，但係佢自己無。」

「佢無？」



「係呀，細妹無。爸爸有、阿公有、阿婆有、你都有，得細妹一個無。」

「佢⋯⋯咁咪好可憐？」

「係架。就算你唔鍾意細妹，佢仍然送依份禮物畀你。我地都唔理佢，就無人理佢架喇。所以媽咪先叫你照顧佢，保護佢。」

我有啲明，又有啲唔明。但無可否認，對細妹嘅厭惡感，已經無以前咁強烈。

水潤嘅大眼張開，純淨無瑕嘅眼神，但深處好似永遠有一個抹唔走嘅污點。



「葬禮嘅時候，妹妹喊得比任何人都大聲。佢同你都係一樣，無咗媽咪好唔開心。」

唔同嘅係，妹妹由一開始就無同媽咪一齊嘅記憶，連記起都無辦法做到。而我，仲有能力去記起。

從來無，同曾經有，到底邊一方更令人痛心呢？

「咁我⋯⋯應該點？」