[有沙入眼]是咁的，我覺得我住嗰度有啲唔妥: 125黑幕

我問點解，點解媽咪唔嚟探我，每次都只會得到相同嘅答案。我喊，喊到眼淚將我淺藍色嘅衫染成深藍色，喊到眼袋腫脹而擘唔大眼，喊到隣居以為阿婆虐待我，喊到嘴唇麻痺，嘴入面淨係認得淚水溫熱嘅鹹味⋯⋯但喊得幾淒涼都好，幾聲嘶力竭都好，媽咪都係無翻過嚟。

我喊到咁，你唔心痛咩？媽咪又話最錫我最愛我嘅？愛我點解忍心眼白白望住我喊成咁都唔翻嚟喎⋯⋯

始終未能夠接受現實嘅我，每次喊到無氣，就會行去扭開門鎖，咔嚓，小心翼翼咁窺探大門後面，睇吓媽咪有無企喺鐵閘外面等我。

電影已經落幕，故事早就完結。舞台上嘅演員同主角退咗場，留低覺得故事未了嘅觀眾喺劇院嘅座位上。

我等，等待下一幕嘅上演，等待片尾曲之後宣告待續嘅片段。



但迎接我嘅永遠只有無聲嘅黑幕。